Jamshedpur an chak; Mizo an mawi

Indian Super League inkhelah Jamshedpur FC chuan Thawhṭanni zan khan tlawm la nei lo ATK Mohun Bagan chu 2-1 in an hneh a, Nerijus Valskis chuan JFC tan goal hnih a khung. 

Jamshedpur-in 2-0 a hma an hruai hnuah Mohun Bagan tan Roy Krishna chuan si phurh a sut ṭhen a, goal dang erawh a keng tel lo - Fijian striker goal khung hi offside position aṭanga lut ni mah se referee berin a pawmsak miau a, danglamna erawh a thlen phak lo. 

Men of Steel (Jamshedpur sawina) tan Mizo striker William Lalnunfela chu tlarhmaah Valskis nen inkawptir an ni a, Kolasib tlangval hian khelmuala minute 90 hun a hman chhungin a taima a, a khel ṭha takzet. 

English coach Owen Coyle-a'n full back atan Laldinliana Renthlei leh Ricky Lallawmawma a rin chhunzawm a, Mizo defender pahnih pawh Jamshedpur tan an khelh chhunzawm zel ang tih a lang. 

Hnahthial tlangval Isaac Vanmalsawma chu minuite 82-naah bench aṭanga luhtir a ni a, Mohun Bagan lamin Mizo player kawl an nei lo thung. 

Zanin ISL-ah inkhel pakhat a awm dawn a, Mumbai City chuan dar 7:30-ah Chennaiyin FC an mikhual dawn - Mumbai-in Hmingthanmawia (Valpuia) chu Mizo player an kawl a ni a, Chennaiyin-ah Jerry Lalrinzuala, Lallianzuala Chhangte leh Lalchhuanmawia Fanai an awm thung. 

South Indian club tan Lianzuala leh Jerry chu inkhel bul ṭan leh tura beisei an ni a, Chhuantea erawh Kerala Blasters nen an inkhelh ṭuma a inhliam avangin a la inlan thei dawn lo. 

Lengpui tlangval chuan, "Thawhṭanni aṭang khan ka tlan ṭan ve leh tawh a, mahse a hranin training pawh ka la nei rih. Mumbai chu ka la hmachhawn hman lo ang," tiin Vanglaini a hrilh. 

Bengaluru laka inhliam midfielder Anirudh Thapa hliam a serious loh thu coach Csaba Laszlo chuan a sawi bawk a, mahse Thapa inlan theih dawn leh dawn loh erawh sawi lawk theih a la ni lo thung.