Ferrari driver Leclerc a chak ber

Pathianni zanlaia tlan zawh tak Formula 1 United States Grand Prix-ah Charles Leclerc a chak ber a, driver championship lama hmahruai mektu Max Verstappen chu pathumnaah a thleng thung.

Intlansiak tawp lamah boruak a nung thar viau, Lando Norris chuan lap hnuhnung bera Verstappen tlanpelh a tumna lamah dan a bawhchhia a, hei vang hian 'five-second penalty' pek a ni.

Driver pahnih hi dawhsana lawn phak zawk nih tumin an inum na hle a, hun pawimawh laiah tawnhriat nei ṭha Max a chefuh zawk a, pathumna niin nomawi humhim a tumna lamah a hmahruaina a sawhnghet.

Red Bull driver Verstappen chuan, "Intlansiak hautak tak a ni, pathumna ni phak tur khan ka theihna zawng zawng ka hman a ngai hial a, ka tan chuan dawhsan lawn phak hi result ṭha tak a ni," tiin a sawi.

Verstappen hian driver championship-ah point 354 hmuin hma a hruai chhunzawm a, amah pahnih bertu Norris nen an inkarah point 57 a awm a, a chesual viau a nih loh chuan a champion leh ngei pawh a rinawm.

Tun season chhungin car intlansiakna sang ber hi tlan hmabak panga an la nei a, heng intlansiak panga aṭang hian Sprint Race vawi hnih a la awm dawn bawk, point hmuh belh theih a la tam avangin driver dang tan beisei tur a la awm.

Verstappen-a'n kumin June thla hnuah chak ni hmel a la hmu leh rih lo, season tir lamah kal fawr viau mah se a zuih rih a, pahnihna Norris hian na taka a nawr ve reng avangin inelna a la hmuhnawm chho zel dawn.

Leclerc leh Ferrari tan US Grand Prix hi chanchin lawmawm thlenna a ni thung, tun season chhungin vawi thum a chakna niin a hnungah a teammate Carlos Sainz a thleng thung.

Circuit of the Americas-ah hian kum 2018 khan Kimi Raikkonen a chak a, ani hnuah chuan Ferrari driver zingah Leclerc hi chak leh thei hmasa ber a ni a, amah leh a team tan chanchin ṭha a ni.

Leclerc chuan, "Intlansiak duhawm leh nuam tak a ni a, a hma lama khawhar tak tlan theih hi chu driver zawng zawng duhthusam a ni, chutiang chu tun ṭumah khan kan thlentir thei a ni," tiin a sawi.

Khawvela car intlansiakna sang leh ngaihhlut hlawh ber Formula 1 hi Ocotober 27, Pathianni zan dar 1:30 hian an tlan chhunzawm leh dawn. Autodromo Hermanos Rodriguez-ah Mexican Grand Prix an tlan ang.