Beiseina neitu Atletico Madrid

Atletico Madrid-in Barcelona leh Real Madrid an um ve zel a, Pathianni zan khan an mikhual Leganes chu 3-1 in an hneh - mikhual team hian Yvan Neyou hmangin goal hmahruai an khung a, mahse, Diego Simeone-a naute hian second half-ah goal thum hmangin an chhanglet.

Metropolitano Stadium-a inkhelah Atletico tan Alexander Sørloth chuan goal hnih a khung a, Villarreal aṭanga Atletico pantu striker hian amah sawiseltute a chhanglet. Norwegian striker hian season hmasa khan Villarreal tan league match 34-ah goal 23 a khung a, Atletico-in euro maktaduai 32-in an la lut.

Atletico tan hian a match hmasa berah a club hlui Villarreal hmachhawin goal a khung nghal a, hemi hnu hian a reh vang vang - Pathianni zanah a khung ve leh ta chiah a, league match 10-ah goal thum khungin, assist vawi hnih a nei.

Madrid khaw club tan hian Antoine Griezmann chuan goal khat a thawh ve bawk a, 3-1 in an chak - table-ah pathumna an ni a, point sarihin hmahruaitu Barca an phak lo mek.