Europa League Arsenal, Tottenham leh Leicester inlan hun

Zanin aṭangin UEFA Europa League 2020-21 khelh ṭan a ni leh dawn. Premier League club zinga mi - Arsenal, Tottenham Hotspur leh Leicester City te chu Mizo ten kan ngaihven tur zinga mi an ni.

European football inelna sang pahnihna hi Ningani zanah zel khelh a ni ṭhin a, kar tawpah league match khelh chhunzawm a ngaih ṭhin avangin group stage chinah chuan club lian deuh chuan an player chhawr rim loh inlantir nan an hmang ṭhin.

Team inlan tur hi group hrang 12-ah ṭhen hran an ni a, group pakhatah team pali zel awmin an inkhelh kual hunah a sang pahnihin knockout round an lut ang. Champions League group stage paltlang zo lo team pariat ten last 32 aṭang hian an lo zawm ve bawk ang.

Arsenal-in Europa League khel tur squad an tihchhuah khan Mesut Ozil an telh lo a, tun hnaia Premier League khel tur hming an thehluhah pawh an telh chuang lo - kumin chhung chu senior team tan a inlan dawn lo tih a chiang.

Mikel Arteta-a'n Austrian club Rapid Wien hmachhawn turin squad a siksawi ngei a rinawm, rawlthar rual tan hun ṭha a ni ang. Chutihrualin tlarhnung laiah chuan tawnhriat nei ṭha David Luiz chu naupang rual ho khawm turin a luh a rinawm.

Gunners hian kar tawpah Leicester City an mikhual zui dawn avangin Pierre-Emerick Aubameyang leh Willian te an chhawr a rinawm loh, Eddie Nketiah, Reiss Nelson leh Joe Willock te an inlan thung a, player naupang rual hruai chung pawhin chak tura beisei an ni.

Nomawi an duh vangin Tottenham-in Jose Mourinho an ruai a, season bul ṭan aṭangin thapui an thawh. Europa League qualifying an khelh lai aṭangin player ṭha an chhawr nghal a, zaninah an neih ṭhat an hmang leh a nih pawhin a mak lo ang.

Spurs hi an league match hnuhnung berah an che fuh tawk lo, si thum faia hma an hruai hnuin West Ham nen 3-3 in an inhnehtawk. Manager Mourinho-a'n a naute chu an rilru a paukhauh tawk lo tih a sawi a, eng ang tak nge an nih tih chu zaninah fiahin an awm dawn.

Gareth Bale an neih let avangin Spurs an hlim a, tun dinhmunah erawh captain Harry Kane leh Son Heung-min te inkawp chu an innghahna leh thlamuanna a ni. Hmatawng pahnih hi an inlan a nih pawhin kartawpa league an khelh zui dawn avangin an tha a khek ṭhen a rinawm.

Season hmasa khan Leicester City an khel ṭha hle a, season chanve hma lamah chuan league nomawi beisei phak zingah an awm. Mahse season chawhnu lamah an zuih avangin a tawpah meuh chuan UCL pawh an khel phak lo - zanin dar 12:30 hian hian Ukrainian club Zorya an mikhual ang.

Brendan Rodgers-a'n hliam vangin Jamie Vardy a chhawr theih a la rinawm loh, English striker awm loh hlanin Aston Villa an ngam lo a, an tlarhma a bil. Vardy hmunruak luah tur an neih a ngai a, Kelechi Iheanacho chungah mawhphurhna a tla dawn.

Foxes tan James Maddison chu a tir aṭanga chhawr theih a ni dawn a, chanchin lawmawm a ni. Ani bakah hian Ayoze Perez a la awm bawk avangin an che sual viau a nih loh chuan Villa laka goal khung kawnga harsatna an neih kha an sutkian a rinawm hle.