Barca vs Bayern: Goal khung thiam pahnih zaninah intawng dawn
Champions League-ah zanin dar 12:30 hian inkhel hmuhnawm bik en tur a awm dawn - tun season European top flight league-a goal khung uar tak pahnih Barcelona leh Bayern Munich an innuai dawn a, a hmuhnawm ang.
Barcelona hian tun season La Liga match 10 an khelh aṭangin goal 33 ngawt an khung tawh a, hmachhawn an châkawm lo - Bayern pawhin match sarih lekah goal 24 ngawt an khung tawh a, Bundesliga-ah goal 20 khung kai ve dang an la awm rih lo!
Zaninah attacking football hmuhnawm en tur a awm dawn tihna a ni a, Hansi Flick-a'n treble champion a lo nihpui tawh Bayern lakah hnehna hlado chham a châk dawn.
Barca harhtharna
Flick-a hnuaiah Barca an insiamrem mek a, league match 10-ah vawi kua chakin, vawi khat chiah an la tlawm. Point thumin anmahni hnaih bertu Real Madrid aiin an sang a, mahse, Inrinni zan hian league-ah Real an lenchilh zui dawn avangin Flick-a tan fimkhur taka ngaihtuahna sen a ṭul ang.
Catalan club hian Champions League-a an match hmasa berah rin loh takin AS Monaco chu 2-1 in an ngam lo a, match hnihnaah 5-0 in Young Boys an sawp. Hei vang hian Barca tan zaninah tlawm a thiang lo tiin a sawi theih a, an chak lo leh a nih ngat chuan an tan knockout round luh a harsa tawh dawn.
Hei vang hian Spanish club tan thapui thawha fehchhuah a ṭul a, Raphinha, Robert Lewandowski leh Lamine Yamal te tan mawhphurhna a sang lehzual dawn a, goal an khung theih ruala a chhuah lam pawh uar tel team hian Bayern tlarhma hriam lakah tlarhnung an ven uluk a ṭul bawk ang.
Kompany-a Bayern
Bayern Munich-in nipui transfer-ah rin loh takin Vincent Kompany chu coach ni turin an la lut a, mahse, Burnley coach hlui hian hna a thawk ṭha rih hle - league match sarih an khelh tawhah tlawm an la nei lo.
Mahse, Bayern hi Barca ang thoa Champions League-a chesual an ni a, hei tak hi zanin inkhel tingaihnawmtu leh en tichâkawm zualtu a ni - match hmasa zawkah Dinamo Zagreb chu 9-2 in sawp mah se, match hnihnaah Aston Villa chu 1-0 in an ngam lo a, club lian inti Bayern tan a tlawm thlak.
Hei mai hi a ni lo. German club hian Paris Saint-Germain hmachhawn tur an la nei bawk a, zaninah chesual leh ta ngat se match thum aṭangin point thum chauh an nei dawn tihna a ni a, an dinhmun a chhe khawp ang - zaninah tlawm a thiang lo!
Lewy vs Kane
Barcelona-in Bayern duhlai Lewandowski an chhuhsak a, kum 36 mi striker hian Catalan club-a a season hmasa pahnihah Bayern-a a vanglai phak lo mah se, coach thar Flick-a hnuaiah a vul leh mek a, a tar ve thei lo a ni ber.
Lewy hian tun season inelna hrang hrangah match 12 khelin goal 14 a khung tawh a, Yamal leh Raphinha te nena tlarhmaa an rawn ding tur hi Bayern tan dan a harsa dawn - hetihrual hian German club hian Harry Kane an nei ve tho tih hriat a ṭha.
English striker hian season hmasa khan match 45-ah goal 44 a khung a, a career-a season khata a khung hnem ber a ni. Tun season-ah pawh match 10 khelin goal 13 a khung tling leh der tawh a, Lewy sulhnu a phak lohna chu nomawi chiah a ni - zaninah Barca laka ṭhat chhuah a tum dawn lo a, a career-a a vawi khat nana European club champion player nih a tumna kawngah a inthlahdah lo ang.