Liverpool leh Van Dijk indawr mek

Premier League hmahruaitu Liverpool chuan an captain Virgil van Dijk chu contract thar chungchangah indawrna an neihpui mek a, season tawp ruala a contract hmang zo mai tur Dutch defender hian contract thar a ziah ngei a beiseiawm.

VVD hian January 2018 khan Liverpool hi Southampton aṭangin a zawm a, hetihlaia a man zat hi pound maktaduai 75 niin, a hunlaia defender man to ber a ni - Reds-ah nomawi chawi theih ang chu chawi kim tawhin, Liverpool hi an inseng thlawn lo chiang hle.

Mahse, VVD hi kum 33 mi a ni ve tawh a, season tawpah a contract a hman zawh tawh dawn bawk avangin chhuak mai tur anga sawi thawm a ri ring hman hle. Mahse, amah ngeiin contract thar chungchangah indawr mek a nih thu a sawi chhuak ta.

Netherlands interna-tional chuan, "Inbiakna kan nei a, enge thleng zel chu kan hria ang chu. Kei chuan tunah chuan Liverpool chiah ka ngaihtuah a, kan hmabak match awma chak zel hi ka duh a ni mai.

"Kan hmaah engnge lo thleng dawn ka sawi thei lo a, tuna ka sawi theih awmchhun chu contract thar chungchangah indawrna a kal ṭan tih hi a ni," a ti a, a kum zat ngaihtuahin rei tak contract a ziah hi a rinawm tawh chiah lo.

Premier League, Champions League, FA Cup, League Cup leh FIFA Club World Cup thlenga Liverpool tana champion tawh VVD hi Reds tlarhnungah a la pawimawh hle - tun season-a league match riat an khelh tawhah vawi khat chiah an la tlawm a, goal thum chiah an la chhuah.

VVD chuan, "Ka rilru a hlim a, ka taksa pawh a ṭha a, nuam ti takin ka inkhel a ni. Thutlukna kan siam hunah chuan media lam pawhin inhre vat ang," a ti. Dutch defender chuan an tlarhnung khawng chungchang sawi zuiin, "Season ṭantirah kan goal chhuah chhan tam tak kan zir a, thil kan thlak nual.

"Tlarhnung chauhin siamrem theih a ni lo a, team puma ṭan a ngai. Kei leh Ibou (Konate) emaw goalkeeper ten fak kan hlawh mai thei a, mahse, team pumpui thawhrah a ni," a ti.

Liverpool boss Arne Slot chuan, "Mi zawng zawngin an hmuh loh piahlam thlengin ka hmu a, training-na thlengin VVD hi chu a ṭangkai. Training-naah pawh theihtawp chhuahin a au reng a, amah hi team hruaitu diktak a ni," a ti a, a captain chu a fak.

Hetihlai hian Liverpool player langsar zingah, Real Madrid nen sawi zawm Trent Alexander-Arnold leh Saudi Arabia lamin an duh em em forward Mohamed Salah te pawhin season zawh rualin contract an hmang zo tawh dawn a, player pahnih chungchangah thuthar a la awm rih lo.

Liverpool hian zanin dar 12:30-ah Champions League match khel turin RB Leipzig an lenchilh dawn a, Pathianni zan dar 10:00-ah league match khel tura Arsenal an lenchilh zui dawn avangin coach Arne Slot-a tan player siksawi thiam a ṭul dawn.

Reds hi Champions League lamah pawh an duai lo hle. Match hnih an khelh tawhah an chak ve ve a, Italian club ṭha AC Milan chu San Siro-ah 3-1 a hnehin, Serie A club vek Bologna chu Anfield-ah 2-0 in an hneh tawh bawk.