Mizorama fit ber Dawngtea

LPS Fitness Festival 2024 hman mekah Mizo mipa fit ber a hriat ta. Laldawngzuala chuan champion lai Stephen C. Thanmawia leh lehtalin a champion a, a vawi khat nan a chungnung ber.

Inelna hi ni thum chhung HT Futsal Ground, Ramthar North-ah neih niin, taksa fit ber thlang tur hian inelna chi hrang hrang 15 teh meuhah inelna an nei a, chumi a an point hmuh hrang hrangte chu belhkhawm a nih hnuah champion hi a hriat ta a ni.

Ramhlun Venglai tlangval Dawngtea chuan, "Taksa hriselna hi ka ngaipawimawh a, zuk leh hmuam ka insumin theihtawpin eitur ṭha ka ei ve ṭhin bawk. Ka naupan lai aṭangin tlangval fit leh hrisel nih hi ka tum ṭhin.

"Chumi tur chuan ka theihtawp ka chhuah ṭhin a, ka naupan lai aṭangin midang aia fit nih tumin ka bei ṭhin bawk, ka duhthusam pakhat chu tunah hian a hlawhtling ta a ni," tiin Vanglaini a hrilh a, tun hma aṭangin DZR Gym-ah a taksa a sawizawi ṭhin a ni.

LPS Fitness Festival 2024 hmawr bawkna hi Mister Mizoram, Jr Mister Mizoram leh Mens Physique 2024 thlanna nen neih kawp a ni leh dawn. October 24, Ningani zan dar 7:00 hian LPS Arena, Falkland-ah neih a ni ang.