Pro Fight tel tum an ṭhahnem

Zudio LPS Pro Fight khelh hun a hnai a, tualchhung boxing inelna lian leh ngaihhlut hlawh hmachhawn tuin boxer 322-in entry form an theh lut a, October 28 khian LPS Arena, Falkland-ah inbukin tel tur zat dik tak hriat theih a ni ang.

Thla liam ta September 23, Thawhṭanni aṭang khan LPS Office, Zarkawtah tel tumten lehkha theh lut ṭanin October 19, Inrinni thleng khan hun hawn a ni a. Weight lian pahnih middle leh welter-ah boxer 65-in form an theh lut a, a rit ber middle-ah boxer 23-in form thehlutin an tlem ber a, welter-ah boxer 42-in form an thehlut bawk. Weight te pathum - fly, bantam leh light weight-a boxer form thehluh zat belhkhawm chu 257 a ni.

Mizoram ṭhenawm Lamka, Manipur aṭangin boxer pasarih, Meghalaya aṭangin pali, Assam leh Myanmar aṭangin boxer pakhat ve vein form an theh lut bawk. Mizoram pawn aṭangin boxer 10 chuangin tel an tum a ni.

October 28, Thawhṭanni zing dar 8 aṭanga chhun dar 12 thlengin LPS Arena, Falkland-ah an hriselna endik hmasain an inbuk dawn a, hemi hnu hian tel tur zat dik tak a hriat ang. October 31-ah LPS Office-ah fixture tar chhuah a ni ang.

Nikum khan weight hrang pangaah boxer 281 an tel a, tun ṭumah hian title fight-ah bantam champion Laldinsanga, welter champion Lalruatzela Hauzel leh middle champion C. Lalhruaitluanga ten anmahni cho thei tur an lo nghak dawn.

Title humhim turin fly champion lai NT Lalbiakkima dinhmun a chiang lo ve thung a, HC Lalramfela'n lightweight title kalsanin a tir aṭangin welterweight title a chuh dawn bawk a ni.

Ruahman dan chuan November 1, Zirtawpni zanah LPS Arena-ah ṭanin December kar khatna thleng a awh dawn a, weight hrang pangaah lawmman Rs 6,50,00 sem chhuah a nih dawn bakah KT Enterprise-in boxer, referee leh judge tiṭhate chawimawina tumsakin GIG Motors-in fighter of the night lawmman a tum dawn bawk a ni.

Pro Fight hnuhnung vawi ngaah Tata commercial vehicle dealer Zothan Autoworks-in title sponsor vawi li changin tun ṭumah Zudio hmingchawiin championship neih a ni ang.

D3 Business Enterprise, RS Traders Third Eye Solution, Thansanga and Sons Auto Division Yamaha Racing, Orient Goldsmith, Kuriz Colection leh Wurfel ten an sponsor bawk.