Taekwondo team-in medal pathum hawn

40th National Senior Kyorugi & Poomsae Taekwondo Championship neih zawh takah, Mizoram team chuan gold medal pakhat leh bronze medal pahnih an hlawh chhuak.

Pondichery-a inelna neihah hian Mizoramin medal lakna hi, Poomsae inelna huangah niin gold medal hi under 30 male team category-ah niin, under 30 female team-ah leh under 30 male individual category-ah te bronze medal an la bawk.

Gold medal latu male team te hi H. Vanlalfela, Lalthlamuanpuia leh Daniel Lalhumthanga te ṭangho an ni a. State/central service aiawh 29 te nen round tinah Poomsae 2 ṭheuh hmangin an inel. Mipa inelnaah hian kum nga chhung ṭha ber nih in chhawk Mizoram leh SSCB(Services) te chu mipui mit fukna ber an ni.

Quarter final-ah mi 29 tlingin, semifinal team 16 thlan an ni leh a, final round atan mi pariat thlanchhuah niin mi pariat inelna an neih leh aṭangin rin lawk ang ngeiin Mizoram leh Services bawk an fal chho hle.

National senior champion nilai leh national games gold medalist ni bawk Mizoram chuan point 6.450 hmuin hneh takin point 6.112 hmutu Services chu an hneh a, a zawnin an champion ta a ni.

Mizoram team player pahnih Lalthlamuanpui leh H. Vanlalfela te hi November tla a neih tur World Championship atan India Camp zawm turin koh nghal an ni.

Bronze medal lakna pakhat zawk women team-ah hian Doris Lalhmangaihzuali, J. Zothanzuali leh Vanlalhmangaihzuali te tang ho in final thlen nan quarter 20-na niin, semifinal-ah palinaah an in vawrh chho a, final round-ah pathumna an ni.

Bronze medal lakna dang hi Lalthlamuanpuia'n individual male poomsae inelna aṭanga a lak niin quarterfinal aṭangin chunga Services leh Maharastra te chu final round thleng a lehthal zo ta lo. Service (6.23) leh Maharastra (6.12) te hnungah Thlamuanpuia (6.21) hi a awm.

Mizoram aiawh hian player 15 leh official pali an kal. 39th National Games, Uttarakhan January a neih turah mens team, womens team, men individual leh kyorugi under 87kg ah te an qualify nghal a ni.

Mizoram team hi coach Lalinpuia, Armed Veng South & R. Lalchhandama, Mission Vengthlang, technical official Joseph Thansanga, Electric Veng & Robert Laltluangkima, New Serchhip ten an hruai a ni.