Goal kua khungtu Mizoram dinhmun a ṭha lo

29th Senior Women's National Football Championship for Rajmata Jijabai Trophy 2024-25-ah Mizoramin October 21, Thawhṭanni zan khan Telangana 9-0 in an sawp a, B. Malsawmzuala hoten point thum hlu tak hlawh chhuak mah se match hmasa bera Jharkhand an hneh loh avangin tla thei dinhmunah an ding.

Zanin dar 6:00 hian Kanchenjunga Stadium, Siliguri-ah Jharkhand leh Telangana an inkhel dawn. Group khat aṭanga pakhat chauh tling tur a nih avangin Jharkhand hian point an hmuh hrim hrim chuan quarterfinal an lut ang a, Mizoram an tla thung ang.

Mizoramin Telangana lakah bul an ṭan ṭha a, Lalrinmuani hmangin minute riatna lekah goal an khung. Minute 13-naah Telangana player Vadlakonda Chaithanya hnawhchhuah a ni zui a, player 10-a khel lakah Mizoram zahngaihna an lantir lo.

Mizoram tan Rinmuani'n goal khat dang a khung belh bakah Lalthansangi'n hattrick a siam a; Grace Lalrampari Hauhnar, Cindy Remruatpuii Colney, Lalhriattiri leh K Ngopawdi ten goal khat ṭheuh an khung.

Sawmtea hoten match hmasa berah team ṭha Jharkhand an hmachhawn nghal a, an insiamrem hman loh avangin inkhel dang result-ah an innghah a ṭul phah. Chhiarkawp danin Mizoramin beiseina la nei mah se Jharkhand leh Telangana khelh tawh dan thlir chuan Mizoram tan beisei neih ngamna chi a ni tawh lo.