Neymar a inkhel thei ve leh ta!

Hliam vanga kum khat chuang a inkhelh theih loh hnuah Neymar chuan khelmual a rap ve leh ta a - Thawhṭan zan khan Al-Hilal tan a inlan a, a team hi an chak.

Asian Champions League-ah Al-Hilal hian UAE Pro League side Al-Ain chu 5-4 in an hneh, he inkhelah hian minute 77-naah Neymar hi bench aṭangin a lut a, a hmuna entu te lawm a hlawh hle.

Al-Hilal tan hian Salem Al-Dawsari chuan hattrick a siam a, ani bakah hian Sergej Milinkovic-Savic leh Renan Lodi te chuan goal khat ve ve an khung bawk a ni.

Brazilian forward hi nikum October 17 khan ram tana a fehchhuahna lamah a inhliam, a khup hliam zai niin chawlh a ngai rei vang vang hle a, club leh an ram tan channa lian tak a tling.

Kum 2023 August thla khan Neymar hian Paris Saint Germain aṭangin Al-Hilal hi a zawm; Saudi Pro League club tan hian a inlan hman mang lo, tunah chuan an lakluh chhan ang takin a inlan chhunzawm thei tawh tura ngaih a ni.

Neymar chuan, "A awlsam lo ngei mai, ka taksa dinhmun erawh a ṭha. Team ṭha tak kan nei a, kan chak bakah ka inkhelh leh thei tak avangin ka hlim takzet a ni," tiin a sawi.

Al-Hilal hi Saudi champion lai an ni a, tun season kal laiah pawh league match vawi sarih an khelh tawhah la chak vekin hma an la hruai - tunkar tawp hian Al-Taawoun an hmachhawn zui leh nghal ang.