Yamaha First Division a hmuhnawm dawn

Aizawl DFA buatsaih Yamaha First Division phase II chu vawiin hian RG Stadium-ah khelh chhunzawm a ni dawn a, champion tur a hriat chhoh dawn. Chawhma dar 11:00-ah Dinthar FC leh Kanan FC te an inkhel dawn a, chawhnu dar 2:00-ah College Veng FC leh Ramhlun North FC te an inkhel ang.

College Vengin Dinthar hnehin phase II-ah bul an ṭan a, vawiina an hmachhawn tur Ramhlun North erawh phase I-ah goal khung hmasa mah se 3-1 ngawtin an hneh lo. Phase II-ah erawh College Veng hi point thum hmu tawh an ni a, Laldampuia kaihhruai Ramhlun North-in nomawi an duh a nih chuan vawiin hian hnehna chan ngei a ṭul ang.

Chawngthansanga kaihhruai Kanan FC-in Ramhlun North hnehin bul an ṭan a, vawiina an hmachhawn tur Dinthar hi an veng ṭhenawm ni ngawt loin phase 1-a 3-2 a an hneh lo hnu an ni. Kanan hi season hnuhnung pahnihah league round-a che ṭha siin knockout chinah an vanduai ve ve. Kuminah erawh inelna kalphung an thlak a, Kanan tan hun ṭha a ni thei ang.