Forest an kal zel - Palace an ngam

Nuno Espírito Santo enkawlna hnuaia team tawh khirh Nottingham Forest chuan Thawhṭanni zan khan 1-0 in Crystal Palace an hneh a, match thum hrem vanga a naute ho thei lo Nuno tel loa an inkhelh hmasak berah an chak - tun season-a league match riat khelh tawhah vawi khat chiah an la tlawm!

Forest tan hian Chris Wood chuan inkhela goal awmchhun a khung a, mikhual Palace-in a chhanletna tur an neih loh avangin tun season-a a vawi nga nan an tlawm - Palace hian league match riat khelh tawhah chak an la nei ve miah lo.

Mualneitu Forest-in hnehna an chan avangin table-ah pariatnaah an chho a, league match riata an vawi thum chakna niin, vawi li draw an nei a, vawi khat an tlawm. Forest hian Liverpool leh Chelsea pawh hmachhawn tawhin, inkhel pahnih aṭang hian point li an hlawh chhuak.

An thamral

Palace-in tun season-a league match riat an khelh ṭangin point thum chiah an la nei a, draw aṭanga an hlawhchhuah vek a ni - Thawhṭanni zanah pawh London club hi an vanduai tiin a sawi theih a, vanneihnain an lam a ṭang rih lo em ni chu aw, tih mai tur a ni.

Eberechi Eze leh Eddie Nketiah ten Palace tan goal khungna chance nei ve ve mah se, an chhawr thei lo a, uiawm takin woodwork an tihper - Forest keeper Matz Sels-a'n fak a phu bawk a, hun tawp nan minute 10 chauh a awm tawh tiha Jeffrey Schlupp-a chance a dansak chu a pui hle.

Forest hian minute 65-naah Chris Wood hmangin inkhela goal awmchhun an khung a, hei lo pawh khung thei dinhmunah an ding ve tho - Elliott Anderson leh goal khungtu Woods ngei pawhin chance duhawm an hlah a, Ryan Yates pawhin post a tihper kha a ui vawng vawng ang.

Hello Wood

Forest hian nipui transfer lai khan striker an zawng a, tuna Palace striker ni ta Nketiah, Eredivisie club Feyenoord chhuanvawr Santiago Giménez leh Porto forward Galeno te an rim a, an chang lo vek!

Mahse, Forest hian Chris Wood an nei a, kum 32 mi striker hian a rintlakzia a pholang nawn - tun season Premier League match riat a khelh aṭangin goal nga a khung ta a, season hmasa khan goal 14 khungin, loan-a a khelh laiin goal khat a khung tawh bawk.

New Zealand international hi Forest tan Premier League-a goal 20 khung tling thei pathumna a ni ta chiah a, kum 32 mi ni tawh mah se a rintlakzia a pholang zel.