Khalid-a Jamshedpur an kal zel

Indian Super League-ah Khalid Jamil a che ropui zel a, Jamshedpur FC chu league match nga an khelh tawha an vawi li chakna ni turin Thawhṭanni zan khan a chakpui - Jamshedpur hian Hyderabad FC chu 2-1 in an hneh a, table-ah pahnihna dinhmun an luah mek.

Men of Steel tan hian Rei Tachikawa leh Jordan Murray te chuan goal khat ve ve an khung a, 2-0 in mualneitu team hi hma an hruaipui - Hyderabad tan Cy Goddard chuan second half-ah goal khung ve mah se a team a chhanhim zo lo a, 2-1 in Jamshedpur an chak.

JRD Tata Sports Complex, Jamshedpur-a inkhelah hian JFC tan Mizo inlan an awm lo a, Hyderabad tan Ramhlunchhunga chuan inkhel bul ṭanin, bench aṭangin Isaac Vanmalsawma chu luhtir a ni bawk. Chhunga a khel ṭha takzet a, a goal khungna remchang Aizawl FC keeper hlui Albino Gomes-a'n a lo dansakte chu uiawm a tling.

Aizawl FC boss hlui Khalid Jamil chuan, "Kan vaiin kan thawkrim em em vek a, chu chu a pawimawh lai ber chu a ni. Tun anga kan khelh zel hi a pawimawh - team anga thawk hoin, kan thawhrim zel a ngai dawn a ni," a ti a, result nei ṭha mah se, season ṭantir chauh a la nih thu a sawi.

Jamshedpur hi ISL club zinga budget tlem pawl an ni a, player langsar pawh an kawl meuh lo - heti chung hian Khalid-a hnuaiah an che thei viau. ISL match nga an khelh tawhah FC Goa, Mumbai City, East Bengal leh Hyderabad an hneh ta a, an hneh loh awmchhun hi Odisha FC chiah an ni.