Swiatek khumtu Sabalenka

Women's Tennis Association (WTA) chuan hmeichhe world ranking thar a ti chhuak a, thla 11 ngawt mai a chung bera awm tawh Iga Swiatek chu Aryna Sabalenka chuan a rawn nek chhuak.

Belarus nula Sabalenka hian January khan Australian Open nomawi a chawi a, tun season atana Grand Slam hnuhnung ber US Open-ah a champion bawk a, kuminah major title pahnih a la.

Grand Slam a zo a, ranking lama a elpui Swiatek chu China ramah a inkhel ve lo, hetih lai hian Sabalenka erawh inlanin a hlawhtling thung a, nomawi mai bakah number 1 nihna a hlawh chhuah theih phah.

Inkhel loa Swiatek a tlak hniam chhan hi, tun season chhungin a tlem berah WTA 5000 tournament paruk tal khelh a ngaih laiin a inlan tling lo, hei vang hian a point paihsak a ni thung.

Kum 23 mi Swiatek hi a coach hmasa nen an inṭhen a, tunah chuan coach thar a nei tawh. US Open hnuah a la inkhel leh miah lo a, chuvangin tun hnaiah nasa takin a ranking point a tlahniam a ni.

Tun season tir lamah khan Swiatek hi ama hnaih bertu aiin point 4000 chuangin a sang fal, kum tir lam thla ruk chhung khan nomawi panga ngawt a la - mahse season chawhnu lamah a chet fuh loh mai bakah Asia khawmualpuiah inelna a hmachhawn lo.

Hetihlai hian kum 26 mi Sabalenka erawhin zawimuangin hma a sawn zel a, tha a thlah miah lo. US Open hnuah pawh Cincinnati Masters leh Wuhan Open nomawi a chawi a, a tan kum ṭha a ni.

Tennis season a la zo mai lo - a thiam zual pariat inelna WTA Finals chu November thla hian an khel dawn a, inelna hmachhawn turin Swiatek pawh a inbuatsaih mek. Riyadh, Saudi Arabia-ah hian ranking point 1000 lai hmuh tur a awm thei dawn a ni.

Tennis inelna huangah hian nomawi bakah number 1 nih theih hi a hlu a, a bik takin number 1 ni chunga kum tawp hmang thei nih an ngaihlu ṭhin. Kuminah a chung ber awm chunga hun tawp hmang tur a la hriat loh a, a chunga awm Sabalenka leh Swiatek te inum hi a la ngaihnawm dawn hle.