Match hmasa berah Rublev a chak

Tennis inelna Swiss Indoors khelh laiah Andrey Rublev chuan a match hmasa berah harsatna a tawk lo, a khingpui Nuno Borges chu 6-3, 6-2 a hnehin last 16 a inhlangkai.

Russian tlangval Rublev tan inelna hi a pawimawh - season tawpa a thiam zual pariat inelna hmachhawn thei turin kawng dik a zawh mek zel, tun dinhmunah pariatna a ni mek.

Vienna Open lakah Alex de Minaur a inlan thung a, ani hi Rublev-a hnungah chiah awmin anni pahnih hian nomawi bakah ATP Finals khelhna hmun an inchuh chho mek a, ranking point an mamawh zual lai a nih avangin an tan chak a pawimawh.

Swiss Indoors inkhel dangah, seeded pangana Ugo Humbert chuan Jerome Kym lakah vawi 13 ngawt aces a vaw chhuak a, inkhel hmuhnawm takah 6-4, 6-7 (5), 7-5 in a chak. Humbert hian a match lehpekah chuan David Goffin a hmachhawn ang, ani hian Matteo Arnaldi chu 6-7 (5), 6-3, 6-2 in a hneh ve thung.

Seeded pasarihna Arthur Fils chuan fiahna a paltlang - German tlangval Daniel Altmaier lakah 7-6 (5), 6-3 in a chak, set khatah tie break hmangin a vannei a, set hnuhnung zawkah pawh game a hloh hmasak hnuah a tho chhuak.