Premier League Thlirlawkna Kar tawp EPL a hmuhnawm dawn
Manchester United fan-ten Chelsea an hneh loh kha chu an la hrethiam thei a ni thei e. Mahse, Everton laka 3-0 a an tlawm leh kha chu an ngaithiam tawh lo hle. Inrinni zan dar 10 hian Manchester United chuan West Brom an mikhual dawn a, chak loh a thiang tawh lo.
Manchester United captain Wayne Rooney chu khup hliam vangin enkawl a ngai a, West Brom hi a hmachhawn thei dawn em tih a chiang lo. United tana thu lawmawm chu Van Persie a khelh theih beisei a ni. Thawhṭanni khan United Under-21 team-ah khelin goal hnih a khung nghe nghe.
Beisei nei Liverpool
Beiseina sang tak nena season bul ṭan, beisei anga season hmang ṭha leh si lo Brendan Rodgers a nauten Inrinni zan dar 7:30 hian an khelmual Anfield-ah QPR an lo mikhual dawn. English club hlun Liverpool tan Champions League khelh ngei hi duhthsam anih avangin an beiseina neih tlem te chhem nun an duh anih chuan QPR hi an hneh ngei a ngai tawh ang.
Liverpool tum pui tur QPR hi table hnuai ber dawt a awm mek an nih avangin season thara Premier League khelh chhunzawm an duh a nih chuan point hloh a thiang tawh bik lo. Tun dinhmunah QPR hian point 27 hmu mekin table a 17 na Leicester City chu point liin an pha lo mek.
QPR manager Chris Ramsey a zam duh bik lo a, Liverpool chu Hull City laka tlawm hlim an nih hre reng in, Hull pawhin an hneh theih chu an hneh ve theih ngei a rin thu a sawi.
Liverpool hian an match hnuhnung pathumah hnehna an chang lo vek a, Aston Villa leh Hull an hnehloh bakah West Brom chu an inhnehtawkpui bawk. Season thara Champions League khel tur chuan an khelh hmabaka an chak vek a ngaih tawh bakah Manchester United an chetsual a ngai tawh ang.
Tlak hlau pahnih
Season tir lam an phur vanglai inkhel a hmuhnawm tluk zetin season tawp lama division hniam a tlak hlau inkhel a hmuhnawm ṭhin. An dinhmun la him lo ve ve Leicester City leh Newcastle United te Power Stadium-a an inkhel tur hi a hmuhnawm ang.
Leicester tan winger Jeff Schlupp chu a hliam a dam tawh avangin a chhawr theih tawh dawn a, player pawimawh striker David Nugent chu an la chhawr thei lo thung ang. An hremna a tawp tawh avangin Moussa Sissoko chu filed-ah a inlan thei tawh dawn a, hei hi Newcastle tan chanchin lawmawm a ni ang.
Kane vs Aguero
Premier League club 20 aṭangin striker langsar tak tak an awm a, chung zingah chuan Spurs striker Harry Kane leh Man City striker Sergio Aguero an langsar fal hle. Aguero hian goal 21 khung tawhin top scorer a ni mek. Season ṭan dawna mi tam zawkin kan la hriat larloh Kane hian tun season-ah Spurs tan goal 20 khung tawhin Aguero chiah a tluk lo.
Champion lai Manchester City chuan Europe a inlan tum Tottenham chu Pathianni zan khian an luhchilh dawn. Manuel Pellegrini a tan mualpho lutuk lo a season khar turin chak ngei a ngai tawh ang. Hetihlai hian an khingpui tur Spurs hian Europe a inlan an duh ve tho avangin Pellegrini hna hi a awlsam dawn lo.