Wolfsburg tan Champions League kawngkhar a inhawng
Zanin dar 7:00-ah Wolfsburg-in an khelmual Volkswagen Arena-ah Hannover 96 an mikhual dawn a, an mikhual lakah hnehna an chang thei a nih chuan season thara Champions League khel turin an inhlangkai thei ang.
Season duhawm tak hmang mek Wolfsburg hi beisei phak bakin tun season-ah an che ṭha a, DFB Pokal final-a Borussia Dortmund hmachhawn turin an inhlangkai tawh bawk.
Season an hman mek danah Wolfsburg director of sport Klaus Allofs pawh a lawm hle a, "Kan tan chuan hei lo liam a awm lo. He Club leh a innghahna khawpui tan chuan tun season hi season ṭha tak a ni. Kum thum chhung a zawna DFB Pokal semi-final kan khelh hnuin tunah chuan final kan inhlangkai tawh a, Dortmund nen game ropui tak khel turin kan inpeih tawh a ni. Mahse, chu aia pawimawh hmasa zawk chu zanin kan inkhelah hian kan chak ngei a ngai a, Bundesliga-a pahnihna dinhmun kan hauh mek hi kan sawhngheh a ngai a ni," a ti.
Wolfsburg hian season tharah Champions League an khel thei a nih chuan an Champions League khelh vawi hnihna tur chauh a ni dawn a, an khelh hmasak zawkin kum 2009-10 khan an lo khel tawh a ni.