Europe-ah MotoGP an tlan ṭan dawn

MotoGP bike ten Europe a an tlan loh hnuah thla ruk dawn lai a liam tawh a, nikum November a Valencia Grand Prix an tlan hnuah Europe-ah intlansiak ala awm leh rih lo. Pathianni hian MotoGP Spanish Grand Prix chuCircuito de Jerez-ah an tlan leh tawh ang.

Jerez tlankawng hi kum 1986 a siam a ni a, siam anih hnu kum khatah intlansiak a thleng thei nghal. Kum 2005 khan thuam-ṭhat niin tunah chuan khawvela tlankawng ṭha leh nuam ber zinga sawi a ni mek. A sik leh sa nawm vang leh a chhehvel rammawi tak tak te avangin helai hmun hi rider ten an ngaina hle a ni.

Jerez tlankawng hi Km 4.4 a sei niin a zauzawng chu 11m a ni thung. Kawng kawi, veikual panga awmin dingkual pariat a awm thung. Kawng ngil sei lai ber hi 607m a sei a ni.

Nikum khan he tlankawngah hian Repsol Honda rider Marc Marquez chu pakhatna a ni a, Yahmha rider Valentini Rossi chu pahnihna niin pathumnaah Repsol Honda riderDani Pedrosa a thleng thung. Vawi ruk hnehna lo chang tawh Rossi chu chak hnem ber a ni a, Lorenzo chu Pole position chang ngun ber niin vawi li a chang tawh.

Tun season intlansiak pathun an hmachhawn tawh aṭanga point 66 hmu a hmahruai mek tu Rossi bawk hi mipui hmuh chak leh tlan ṭha tur a beisei a ni leh a, amaherawhchu World champion Marquez hi ngaihthah theih a ni lo bawk ang.

Training na a kut ti hliam Marquez chu Pathianni hian a tlan theih beisei a ni a, beisei anga season bul ṭan ṭha lo Marquez hi tun dinhmunah points 36 hmuin championship-ah pangana ani pha chauh a, intlansiak hnu­hnung ber Argentine Grand Prix-ah pakhatna a ni ngei dawna alan hnuah a chetsual vangin point a hmu ta lo a nih kha. A lallu­khum humhim turin tun aṭanga a beih ṭan a ngai tawh a ni.