Zaninah Real leh Barca an inlan dawn
La Liga inum boruak pawh a lian zel a, zanin dar 7:30-ah hmahruaitu Barcelona-in khualmualah a mawngphah bera awm mek Cordoba an lenchilh dawn a, zanin dar 11:30-ah Real Madrid in Sevilla an lenchilh bawk ang.
Mawngphah vs Hmahruaitu
Estadio Nuevo Arcángel-a inkhel tur team pahnih hi an dinhmun a in ang lo hle. Barcelona hian La Liga table chung ber an luah laiin Cordoba erawh a mawngphah luahlumtu an ni thung.
Barcelona hi match 15 chhung chu hneh loh tawng lo in an kaltluang tawh a, an khingpuite goal-ah vawi 15 inkhelah hian goal 41 lai khungin goal riat chiah an chhuah thung. An hnuai chiaha awm Real Madrid aia an sanna hi khelh zat in angah point hnih chiah a ni a, an hmahruaina hi chhawm nun zel an duh chuan zaninah hian an chak ngei a ngai ang. An tlar hma pathum Lionel Messi, Luis Suarez leh Neymar te hian tun season-ah ringawt goal 100 chuang an khung tawh a, Europe club ṭha ber ber defender ten dan harsa an tih an hminglema MSN an vuahsak te lo dan tum hi Cordoba tlarhnung tan chuan a luhai thlak ve khawp ang.
La Liga mawngphah mawitu Cordoba hian January 12 hnu khan match 16 khel tawhin chak hmel an la hmu leh lo a, La Liga match li chiah khelh tur awm tawhah in hamtang tur chuan an beih ve fe a ngai tawh ang. December thla khan Cordoba hian Camp Nou an lo lenchilh tawh a, Luis Suarez chet ṭhat va tawng fuhin 5-0 laiin an tlawm. Zaninah pawh Barcelona hi chak leh ngei tura beisei an ni.
Barca umtu Real
La Liga-ah match li chiah khelh tur a awm tawh a, Real Madrid in hmahruaitu Barcelona an umphak lohna hi point hnih a ni. La Liga champion turin Real in an inkhel hmabaka chak vek bakah Barcelona chetsual chan a ngai a, an tan chakloh a thiang tawh lo.
Real Madrid hian hmahruaitu Barcelona 2-1 a an hneh loh hnu in La Liga match ruk chhung chu hneh loh an tawng tawh lo a, goal 24 zet an khung leh tawh nghe nghe.
Mahse Real tan Sevilla hi hnuaichhiah ngawt theih an ni bik lo, Sevilla khelmual Ramon Sanchez Pizjuan-a an zinchhuah hnuhnung vawi hnih-ah chak hmel an la hmu lo. Sevilla hian tunhnai an match hnuhnung pangaah chak loh hmel an la hmu lo. Vawi thum chakin vawi hnih an khingpuite an inhnehtawk pui a, an khelmuala awlsam taka hneh tur chi an ni lo.