Chennai Super Kings ngam loh Brad Hogg

Ningani zan khan India Premier League-ah Kolkata Knight Riders in Chennai Super Kings an mikhual a, Kolkata team-in mikhual team lakah ṭhat chhuah duh lo in wicket sarih laiin hnehna an chang.

Eden Gardens-a inkhelah hian mikhual team Chennai an bat hmasa zawk a, MS Dhoni leh a naute hian Kolkata bowler Brad Hogg-an ngam lo a, run siam hleithei an awm lo. Opener Dwayne Smith run siam miahloa a out mai bakah Chennai innghahna Brendon McCullum chuan run 32 a vawchhuak hman ṭawk tihin Brad Hogg-a'n a vawm out a ni. Captain MS Dhoni chuan run khat chiah siamin a out bawk. Chennai hian over 20-ah run 165 an vawchhuak hman tihin mi pakua an hloh a ni.

Australian bowler Brad Hogg hi a che na hle a, over li a vawmah run 29 chiah pe in wicket li a la a ni.

Kolkata-in an target an umna kawngah harsatna an tawk tam lo. Robin Uthappa chuan ball 58 a hmachhawnah run 80 vawchhuakin Andre Russell chuan ball 32-ah run 55 vawchhuak bawkin an pahnih hian a tawp thleng an dam a, over 19.5-ah run 169 vawchuakin mi pathum chiah an hloh a, chak zawkah an ṭang ta a ni.

Zanin inkhel turte

Vawiin tlai dar 4:00 hian Royal Challengers bangalore chuan an khelmual M.Chinnaswamy Stadium, Bangalore-ah Kolkata Knight Riders an lo mikhual anga, zan dar 8:00-ah Sunrisers Hyderabad in Rajiv Gandhi International Stadium, Hyderabad-ah Chennai Super Kings an lo mikhual bawk ang.

Pathianni tlai dar 4:00-ah Kings XI Punjab in an khelmual Punjab Cricket Association Stadium, Mohali-ah Mumbai Indians an lo mikhual anga , zan dar 8:00-ah Brabourne Stadium, Mumbai-ah Rajasthan Royals leh Delhi Daredevils an inkhel bawk ang.