Hei le - Mayweather vs Pacquiao

Khawvelin hmuh a chak, boxing khawvela chanchin sum tamna ber tur - Floyd Mayweather leh Manny Pacquiao-te an inhnek dawn ta.

Pathianni zinga boxer ropui pahnih inhnek tur hi khawvelin a hmu chak tawh a, khawvel huap media lian ho news luahtu ber an ni.

Mayweather leh Pacquiao hi khawvel boxer ropui ber anga chhal mek an ni a, heavyweight boxing boruak thihlai tak a lo ni bawk nen khawvelin boxer ropui pahnih, incho tawk tak inhnek hmuh hi a chak a ni.

Kum 1980 hunlaia Sugar Ray Leonard, Thomas Hearns, Roberto Duran leh Marvin Hagler-te vanglai ang khan boxer ropui vanglai inrual ngei inhnek hmuh tur an tam tawh lo a, tun hi heng ho hnua boxer ropui bera chhal pahnih, an vanglai intawng rual ngei inhnek tur an ni a, khawvelin a ngaihlu lo thei lo.

Engnge an inchuh dawn?

Kum 38-a upa Mayweather hian WBC leh WBA welterweight title a kawl mek a, kum 36-a upa Pacquiao hian WBO welterweight title a kawl thung. An title kawl lai ve ve hi inchhuhsak an tum dawn a ni.

Kum 19 professional boxing a khelh chhunga vawi 47 inhneka tlawm hmel la hmu lo Mayweather tan a chak loh chuan a uiawm lehzual ang.

'Tunge ropui zawk?' tih hi mi tam tak zawhna a ni a, naktukah a chhanna kan hmu dawn. A chak zawk chuan an hunlaia boxer ṭha ber an nih thu an sawi ngam anga, a chak lo tan erawh damchhungin theihnghilh theih a ni tawh ngai lo ang.

Tunge chak zawk ang?

Boxer pahnih hi inhnek dan inang lo tak an ni. Mayweather hian a defensive thiam a hming­thanpui laiin Pacquiao erawh a attacking game hmuh­nawm tak larpuitu a ni. An fimkhur dun hle a rin a nih avangin round 12 an khel thleng tura ngaih a ni.

Pacquiao hian a tih dan ṭhin anga a attack vak a nih chuan remchang la thiam Mayweather atan 'knock out' chance a ṭha dawn tihna a ni a, ṭum dang ang lo taka Pacman hi a fimkhur a nih chuan a hmuhnawm lo hle thei thung.

British boxer lar pahnih Ricky Hatton leh Amir Khan bakah Oscar De La Hoya, Manuel Marquez leh Shane Mosley-te chuan Mayweather a chak zawk an ring a, chak turin Pacquiao an duhsak vek thung.

Filipino boxer chak zawk ringtu zingah World Heavyweight champion hlui George Foreman leh Mike Tyson te an langsar a, weight division pali a champion thei Miguel Cotto pawh Pacman chak ring zawk tu tho a ni.

Boxer pahnih hi an inhnek zawhah a chak zawk zawkin boxing an chawlhsan mai ringtu an tam hle.