Good vs Evil

American boxer Mayweather hi anmahni ramchhung ngeia inhnek tur nimahse ṭantu ngah zawk chu Filipino boxer Pacquiao a ni. Boxer pahnih hi an in an loh em avangin Good vs Evil tiin media ṭhenkhat chuan an inhnek tur hi an ziak hial.

Boxer pahnih hi an mizia a inang lo hle. May­weather hi a sum leh pai ngah leh hausak thu mipui hmaa puan nuam ti em em a nih laiin Pacquiao erawh mi inngaitlawm, fan-te dah pawimawh thiam leh Pathian ṭih mi a ni thung.

MGM Grand, Las Vegas-a an inhnekna tur hmun an thlen ṭuma Mayweather titi pawh sum chungchang bawk a ni. Minute 40 chhung chanchinthar lakhawmtu te a kawmnaah Maywea­ther chuan tunhnai ni hnih chhung leka dollar maktaduai 11 a lakluh thu te, car man to tak tak, In lian leh ropui bakah private jet thlenga a neih thu te a sawi duah.

Pacman nena an inhnek tur chu a career hril tu a nih loh thu sawi­in Mayweather chuan, "Vawikhat inhnek lek hi ka career hrilhfiah turin a tling tawk lo. Ka career a ka hlawhtlin leh tlin loh tilang chiang tur ber chu ka sum lakluh zat hi a ni," tiin sum bawk a sawi lang.

Kum 1996-a profe­ssional boxing a luh­chilh hnua vawi 47 inhneka la tlawm miah lo Mayweather chuan, "Sum hi record tih vel mai mai ai chuan a pawi­mawh zawk. Ka fanu te hi pawisa nei lo in ka chawm thei hleinem," a ti.

Mayweather hi ṭawng­kam dengkhawng leh bawlhhlawh tak tak chhah chhuah mai ching a ni a, pawisak a nei tlem hle. Fa pali lai nei tawh Mayweather hi kum 2011 khan a bialnu kut a thlak vangin thla thum chhung jail tang tura tih a lo ni tawh a, mahse a jail tan chhunga Miguel Cotto nen an inhnek tur chu ṭhulh a ngaih dawn vangin a jail tan hun tur hi sawn hlat sak a ni. Cotto nen an inhnek hi ṭhulh ni ta se an inhnekna tur khawpui Las Vegas chuan dollar maktaduai 100 lai a chan phah thei dawn a ni.

Pacquiao hi a career ṭan tir lamah hmeichhe kawp leh sum leh pai chungchangah talbuai viau mahse kum 2013 khan a piangthar a, a nungchang ṭhat leh midang dah pawimawh a thiamna hi a fan-te hip lehzual tu a ni.