Mi hausa pahnih 'inhnek' tur

Boxer pahnih hi sum leh paiah an phang lo dun hle. Mayweather hian kum 19 boxing a khelh chhungin dollar maktaduai 400 a hnek chhuak tawh a, kum thum chhung chu khawvela infiammi sum lalut hnem ber a ni tawh.

Mayweather ang emin hausa lo mah se Pacquiao hausakna pawh hi tam tham tak a ni. Professional boxing a luhchilh hnuin Filipino boxer hian dollar maktaduai 263 a hnekchhuak tawh a, kum 2014-a sum lakluh zat ringawt hi dollar maktaduai 41.8 a ni.

Nikum khan khawvel infiammi zingah Mayweather aia sum lalut hnem an awm lo a, dollar maktaduai 105 lai a lalut. Tuna a hausakna belhkhawm hi dollar maktaduai 295 nia chhutsak a ni. A sum neih leh thil neih te mipui hmaa puanzar nuam ti mi tak hian Las Vegas leh Miami-ah te in ropui tak tak a nei a, car man to tak tak a neih bakah mi 14 phur thei private jet a nei bawk.

Dollar maktaduai 110 nei mek anga an sawi Pacquiao erawh a inhmang tam lo hle. A chawrchhuahna khawpui General Santos City-a a in pangngai takah khawsa mekin tunhnai khan Beverly Hills-ah in ropui tak dollar maktaduai 12.5 man a lei a, tunhnaia sum leh pai lama a insenso tam ber ṭum a ni.

Buaina kara hlawhtling pahnih

Grand Rapids, Michi­gan-a seilian Mayweather hi boxer chhungkua aṭanga seilian a ni a, a pa leh trai­ner ni bawk Floyd Sr. hi welter­weight a khel ṭhin, a defen­sive thiam hmingthan puitu a ni. A pa unaupa Roger Mayweather hi world cham­pion hlui a ni bawk. A nu erawh chhuan tur a nei lo hle, ruihhlo ngai rui reng ṭhin a ni. Mayweather hi a nausen laia a pa nena an khawlai leng chu silaia beih an tawk tawh bawk.

Philippines mipui ten an ngaihsan rawn Manny Pacquiao hian boxing lamah chhun tur a nei hran lo, chhungkaw rethei leh berh ve tak aṭanga seilian a ni. Mi rethei vengah khawsain chaw ei tur zawngin a vak kual ṭhin a, a chang chuan nilenga tui chauh rin chang a nei ṭhin. Kum 10 a tlinin school a kal chhunzawm thei tawh lo a, kum 15 a nihin a pain a ui vulh lai a lo talhsak avangin a tlan bo bawk.

Hun engemaw chen chu Manila kawtthler rem­chang lai apiangah riak ṭhinin boxing a luhchilh a, boxing a khelh ṭan tirh hian vawikhat inhnekah dollar hnih (Rs.127) te a hlawh ṭhin.