Sum tamna inhnek chu

Boxer pahnih hi naktuk Pathiannia an inhnek zawh meuh chuan an hausa haw nawlh dawn. He inhnek aṭanga hlawkna an hmuh aṭangin Mayweather hian 60% a chang anga, Pacquiao hian 40% a chang thung ang. Sum lut tur zat aṭanga chhut chuan American boxer Mayweather hi dollar maktaduai 140-150 inkarin a hausak belh dawn tihna a ni a, Pacquiao hian dollar maktaduai 90-100 inkarin a hausak belh thung dawn.

Kum 2007-a Mayweather leh Oscar De La Hoya inhnek ṭum khan Pay-per-view buy aṭanga boxing-in sum a lakluh hnem ber a tawng a, dollar maktaduai 2.5 vel lakluh a ni. Mahse, he record dinglai hi Mayweather-Pacquiao inhnek tur hian a khum chiang hle turah an ngai. Pay-per-view aṭanga sum lut zawng zawng tam ber ṭumin kum 2013 khan dollar maktaduai 152 lakluh a ni a, tun ṭumah hian Canada, USA leh Puerto Rico aṭang ringawt pawn dollar maktaduai 300 hmuhchhuah beisei a ni.

Mi 16,000 lek lenna MGM Grand Arena-a boxer pahnih inhnek turin gate fee aṭang ringawta sum an hmuh tur dollar maktaduai 74 pawh hi dinchhuahpui tham chu a ni chiang. Record dinglai Saul Alvarez leh Mayweather te'n 2013-a an lo siam tawh chu a let thum vel laiin a khum dawn a ni. Mipui vantlang tana ticket hralhchhuah zat hi 1000 chauh niin zawrhchhuah a nih aṭanga minute reilote chhungin hralh zawh vek a ni. Ticket zawrhchhawnna website ṭhenkhatah chuan ticket hi an zuar to hlawm hle a, a tlawm ber pawh USD 20,000 (Rs.13 lakh) te a ni!

Ticket zawrh chhuah 1000 bak zawng hi celebrities, boxer, promoter leh mi challang tak tak tan hauh a ni a, MGM Grand-ah hian khawvel huap mi lar an pungkhawm hnem a nih pawhin a mak lo ang.