Belgian footballer Mertens a boral
Belgian footballer Gregory Mertens chu lung ṭha lo vangin Nilaithawhṭanni khan hospital-ah a boral.
Kum 24 a upa Lokeren defender hi Thawhṭanni a Genk nen an inkhelh laiin field chhungah lung ṭha lo vangin a tlu a, Genk hospital-ah hruai nghal ni khawl hmanga thawk tir tum ni mah se ṭha chhuak zo loin a boral ta a ni.
Belgium club Lokeren chuan thuchhuah sianin, "Damdawi lam thian ten a dam leh theih na an theih tawp chhuah mah se a nunna an chhanhim zo ta lo a ni. Football hian hlimna leh lungngaihna a keng tel ve zel a, vawiin hian 'Gregory Mertens mangṭha' kan tih a ngai ta hi pawi ka ti hle," tiin thuchhuah an siam.
Belgium U21 tan pawh a lo khel tawh Lokeren hian a senior career chu kum 2011 khan Cercle Brugge aṭangin a ṭan ve a, January khan Lokeren hi a zawm. A club tan hian match 30 khel hmanin season tir lam khan Europa League pawh a khel ve a ni.
Everton forward Romelu Lukaku chuan, "Gregory Mertens tlamuang takin chawl nang che. A chang hi chuan hringnun hi a nunrawng ṭhin a ni tiraw...? Min kalsan mai hi pawi ka ti," tiin a hnam puipa a ui thu a sawi.