Premier League thlirlawkna Chelsea ban phakah Champion nomawi

Pathianni zan dar 6:00 hian Premier League hmahruaitu Chelsea chuan Stamford Bridge-ah Crystal Palace an lo mikhual dawn a, an chak anih chuan match thum khelh hmabak nei chungin kum 2010 hnua a vawikhat nan champion nomawi an chawi thei tawh ang.

Jose Mourinho hian ram hrang hrang Portugal, Italy, England, Spain-ah te a team enkawl a lo champion pui vek tawh a, League title vawi sarih a chawi tawh a ni. Kuminah hian a vawi riat nana chawi leh turin a inpeih tawh hle a ni.

Table a hmahruaitu leh table laihawl ami inkhel tur an nih avangin Chelsea hi chak zawk tur a rin an ni a, Crystal Palace hi kum thara Premier League khel tura an dinhmun a ṭhat tawh bakah Europe a inlan beisei nei tawh chuang lo an nih avangin Chelsea tan a awlsam phah deuh tura ngaih a ni bawk. Crystal Palace hi an game hnuhnung pahnihah 2-0 in an chak loh ve ve avangin a zawna vawithum chak loh chu an duh bik lo ang.

Mourinho hi Real Madrid aṭanga Chelsea a rawn kir leh hnua a season hmasa berah Manchester City tluk lo mah se, a kum hnihnaah chuan a team te a khelh ṭhat pui hle. Premier League match 34 a khelhpui tawh aṭangin vawi 24 hnehna a chanpui a, an khingpui te nen vawih riat inhnehtawkin vawihnih chiah an la tlawm. Goal 68 khung tawhin goal 27 chiah an la chhuah thung. EPL ah goal khung hnember dawt niin goal chhuah tlem ber an ni mek.

Chelsea manager Mourinho tan player duhtlan tur an tam dawn a, midfield-ah PFA player of the year dawng tu Eden Hazard a awm bakah Oscar a khel thei tur a ngaih a ni bawk. Team khaikawm tu Cesc Fabregas a pawimawh leh ang a, tlarhnungah John Terry hian rintlak ala nih zia a lan tir leh ngei a rinawm bawk.

Crystal Palace manager Alan Pardew chuan, "Mourinho nen kan intawn hnuhnung ber kha chuan Newcastle ka la enkawl a, 2-0 in kan hneh nghe nghe. Kha match kha ala hrerengin ka ring, a chhan chu khami ṭum khan a lawm lo in a thimur em em a ni tih kan hrait ṭheh kha. Pathianni zanah hi chuan nungchang mawi kan hmuh tawh ngei ka beisei. Kan tih tur chu kan theih tawp a ṭha tak a khelh a ni dawn, point hmu kan duh avangin Chelsea lakah hian point hmuh ngei kan tum ang," tiin a sawi.