Ball chang tam 'thlawn' United-in Liverpool tiphûr

Old Trafford-ah Manchester United-in an mikhual West Brom goal khatin an hneh lo a, Steven Gerrard goal hmangin Liverpool-in tlak hlau Queen Park Rangers 2-1 in an hneh. A zawna vawi thum goal khung lo leh chak lo United-in point 65 an hmu a, match thum khelh hmabakah Liverpool-in an hmelma hi point li chauhin an pha tawh lo.

United tlar hma a bul

Manchester United-in hmahruaitu Chelsea hneh loh hnuah Everton leh West Brom an hmachhawn a, goal an khung lo vek a, goal an chhuah vek bawk.

United hian ball possession 70% (Vs Chelsea), 65% (Vs Everton) leh 80% (Vs West Brom) nei chunga an chak lo hian Louis van Gaal-a game plan rinhlehna a ti tam a; Radamel Falcao, Wayne Rooney leh Robin van Persie te an awm chunga goal lut thei lo hi zawhna ti tamtu a ni.

Minute 63-naah West Brom captain Chris Brunt-a freekick chu Jonas Olsson a per hnuah a lut a, February thla hnua starting eleven chang Van Persie-a'n penalty a hlah avangin mualneitu United an chak zo lo.

Manchester United manager Louis van Gaal chuan, "Goal hmaah player an inhnawh khawm tih chu kan hre sa a, goal khung thei tur kan ni. Second half-ah goal khungna tur kan nei a, kan hlah si. A zawnin match thum kan chak tawh lo a, kan insiamṭhat a ṭul a ni," a ti.

West Brom manager Tony Pulis chuan, "Uluk taka inrem bakah vanneihna tlem kan mamawh. Player-te inpekna vanga chak kan ni. Penalty kan chawi erawh hriatthiam a har hle," tiin a sawi.

Beiseina siamtu Gerrard

FA Cup champion nomawi an ban pha ta si lo a, Liverpool-in Steven Gerrard tana an theih hnuhnung chu season tawpa Manchester United chunga awm a ni.

Team pahnih hian QPR defender Rio Ferdinand nupui hnute cancer vanga thi Rebecca Ellison hriat reng nan armband dum an hreng ve ve.

Minute 19-na lekah Philippe Coutinho ball pet ṭha tak hmangin Liverpool-in hma an hruai a, QPR-in minute 73-naa Leroy Fer-a volley hmangin an sut. Fer hian a kawr hmaah 'Stay Strong Family Ferdinand' tih a ziak.

Minute 81-naah QPR defender Nedum Onuoha chu hnawhchhuah a ni a, mualneituin tam zawk an nihna hmang ṭangkaiin minute 87-naah Gerrard-a'n a khung. Liverpool captain hian a goal khung hma hian penalty a hlah a, zero aṭangin hero a ni leh ta.

Liverpool manager Brendan Rodgers chuan, "Steven Gerrard hi player danglam bik a ni a, mamawh hun takah a rah ṭhin. Inkhel pawimawh bika chakna khung thei player tlemte an awm a, chutiang zing ami chu a ni," tiin chakna goal khungtu a fak.

QPR boss Chris Ramsey chuan, "Premier League khelh zel thil theih loh ang hial a ni ta. Supporter hoin theihtawp kan chhuah tih an hria a, awlsam tak chuan kan tla mai dawn lo," a ti. QPR hian Manchester City an hmachhawn leh dawn a, an chak loh chuan an tla tawh ang.

Engtin zel?

Manchester United-in Crystal Palace, Arsenal leh Hull City te an la khel dawn a; Liverpool-in Chelsea, Crystal Palace leh Stoke City te an hmachhawn dawn. Champions League khel tur hmun inchuh hi a nep lo ang.

Relegation Battle

West Brom-in point 40 an nei tawh a, him tur zinga chhiar tel ngam an ni tawh a. A hnuaia pahniha awm QPR leh Burnley erawh an him zawh a rinawm tawh lo, Burnley hian West Ham an hneh lo.

Leicester City an phur chho zel a, Leonardo Ulloa goal hnih leh Wes Morgan goal hmangin Newcastle 3-0 in an hneh. Aston Villa-in Everton 3-2 in a hneh a, Sunderland-in Southampton 2-1 in an hneh bawk.

Villa, Leicester leh Sunderland te hi tla thei dinhmunah an ding vek a, anni ang bawka dinhmun derthawng Hull City-in nizan khan Arsenal an mikhual. Hmun hima awm tawh inkhelah Swansea City-in Stoke City 2-0 in an hneh.