Ka hmachhawn tawhah Messi a ṭha ber - Raul
Real Madrid Legend Raul chuan a hmachhawn tawh player zingah Lionel Messi chu ṭha a tih ber thu a sawi.
Raul chuan, "Messi hi ka hmachhawn tawh player-ah chuan a ṭha ber. Zinedine Zidane, Ronaldo, Luis Figo, Cristiano Ronaldo leh player ropui tak tak ka khelh pui tawh a, amaherawhchu Messi hi chu a dang a ni," tiin Barcelona forward a dah san zia a sawi.
Argentina captain a dah san chhan sawiin Raul chuan, "Messi hi chuan thil harsa taka lang pawh hi awlsam takin a ti thei zel a. A inkhel en hi chuan kawngpuia ṭhiante nena inkhel a ang berin ka hria," tiin a sawi.
Raul hian Santiago Bernabeu-ah kum 16 chhung a cham hnuin kum 2010 khan a chhuahsan a, football khawvelah tawnhriat a ngah hman hle.
Real Madrid captain hlui Raul chuan, "Ka inkhelh tirh kha chuan Roberto Baggio leh Ryan Giggs te kha ka hmachhawn zinga player ṭha ka tih an ni. Defender-ah chuan Paolo Maldini a ṭha ber. Italian defender hi tawh a khirh em em a, football history-ah pawh defender ṭha ber a ni pha hial ang. Keeper-ah chuan Oliver Kahn a ṭha ber, Champions League-a Bayern kan hmachhawn hian a goal ven a khung a har takzet a ni," tiin Italian defender leh German keeper te chu a dah sang hle.
A club hlui chungchang sawiin Raul chuan, "La Liga hi hriatthiam a har khawp mai. Barcelona hi hmahruaitu ni mah se season tawp thlengin Real Madrid hi an tlawm lo ang. Champions League-ah Real hian Juventus an hmachhawn dawn a, a harsa khawp ang. Final thleng ngei turin ka duhsak hle," tiin a sawi.
Kum 36-a upa Raul hian Real Madrid a chhuansan hnuin Ger-man club Schalke leh Qatar club Al Sadd tan kum hnih ve ve a khel. Kumin aṭangin MLS club New York Cosmos tan a khel ṭan a, match hnih khel tawhin goal khat a khung tawh.