Brazil tana khelh leh inbeisei Kaka

World Player of the Year pawh lo ni tawh Kaka chuan June a khelh tur Copa America-ah an ram aiawh leh theih a in beisei.

South America a ram hrang hrangte inelna Copa America hi June 11 aṭanga July 4 chhungin Chile-in an thleng dawn. He tournament hi team 12 inelna niin champion lai chu Uruguay an ni.

A ṭum hnih nana Dunga-a'n Brazil a enkawl leh hnuah Brazil hi an khel ṭha tluang hle a, a zawnin match nga chhung hnehna an chang tawh a ni. Chile, France, Austria, Turkey leh Japan te an hneh fai vek.

Kum 33 a upa Kaka chuan, "Tunah hian ngai ka awh chho leh mek a, kan ram tana inkhel thei turin ka inpeih tawh hle. Mahse, ram tan ka khelh leh khelh loh tur hi keima thu a ni lo a, kan coach kuta innghat zawk a ni tih ka hria. Dunga hian min mamawha khel tlaka min ngai a nih chuan ka inpeih reng," tiin a sawi.