I League kawngah Aizawl FC an kir

I League Second Division hmahruaitu Aizawl FC-in an elpui Lonestar Kashmir FC an hneh loh hnuah Pathianni khan Kenkre Sports 2-0 in hneh a, I League panin an kal zel.

Aizawl FC hian Round 12-ah point thum an hlawchhuak a ni ringawt lo a, an elpui Lonestar Kashmir leh PIFA Sports te 1-1 a an inhnehtawk avangin point hnihin MPL3 champion hi an fal leh ta.

Chanmari FC erawh Hindustan FC lakah goal khung hmasa mah se 1-2 in an chak lo a, Mohammedan SC-in an khingpui United SC an hneh bawk avangin palinaah an tla thla.

Aizawl FC an tlo

Mizo mipui innghahna Aizawl FC-in Siliguri-a an match hnuhnung berah Chanmari FC an hneh lo a, Golaghat-a inkhel pawimawh takah Lonestar Kashmir FC an hneh loh zui avangin Aizawl FC dinhmun a derthawng hman hle.

Bokakhat Stadium-ah Aizawl FC-in goal khung an harsat a, Siliguri-ah 4-1 ngawtin Maharashtra club hi sawp mah se first half-ah goal an khung lo a, Kenkre Sports player pakhatin inkhel chawhma lamah red card a hmu bawk.

Second half lai hawl velah Aizawl FC forward Alfred Kemah Jaryan-a'n buai nuai nuai karah a khung a, hun tawp hma minute 10 la awmin William Lalnunfela cross chu Brandon VL Remdika'n goal-ah a chantir leh bawk. Minute 90 zawhah Aizawl FC 2-0 in an chak.

Aizawl FC coach Malsawmkima chuan, "Kenkre-in min draw an tum a, tlar hnungah an inrem khat vek a, goal kan khung lawk loh avangin a hlauhthawn hman hle. Amaherawhchu a hun takah goal kan khung a, Pathian ṭanpuina zarah point thum hlu tak kan hlawhchhuak a ni," tiin inkhel chungchang a sawi.

Lawmthu sawi zuiin Mala chuan, "Mizo mipui aṭangin ṭawiawmna ṭha tak kan dawng a, inkhel entu ṭhahnem tak kan nei a, Mizoram lam aṭangin duhsakna kan dawng nasa bawk. Heng zawng zawng hi Pathian vang a ni a, amah vanga tun dinhmun thleng thei kan ni," a ti.

An hmabak sawiin National Games-a Mizoram gold lakpuitu chuan, "Chanmari FC leh Mohammedan SC kan la khel dawn a, team ṭha tak, tumpui châkawm lo ve ve an ni. Lonestar in draw hlauh mah se kan dinhmun a la him lo," tiin a sawi.

Team dang chanchin

Chanmari FC-in Joel Sunday hmangin first half-ah hma an hruai a, inkhel thununin goal chance ṭha tak tak an hlah. Amaherawhchu second half-ah goal hnih an chhuah avangin Siliguri-a 6-2 ngawt an hneh tawh Hindustan lakah 1-2 in an chak lo.

Chanmari FC coach H. Vanlalthlanga chuan, "Khelh fuh loh ṭum a ni a, a pawi takzet a ni," tiin a sawi.

Lonestar-in table mawngphaha awm PIFA Sports lakah goal an chhuah hmasa a, minute 83-naa Kareem-a goal hmangin an sut hram. J&K club hian Kenkre Sports leh Chanmari FC an la hmachhawn dawn.

Chhiarkawp dana beiseina tlem nei Chanmari FC hi Aizawl FC kawng dal theitu leh hawnsak theitu an ni.