Championship-ah Bournemouth an champion

Season thara Premier League khel tur Championship club Bournemouth-in khualmualah Charlton Athletic chu 3-0 in an hneh a, an champion.

Season thara Premier League khel ve tur tho Watford chu champion tura beisei ni mah se an khelmualah Sheffield Wednesday an inhnehtawk pui laia Bournemouth an lo chak bawk si avangin pahnihna dinhmunah an lungawi a ṭul ta a ni. Watford hian kum 2006-07 season hnua Premier League an khelh leh hmasak ber tur a ni nghe nghe.

Championship division aṭang hian Premier League khel turin team pathum an inhlangkai ṭhin a, pakhatna Bournemouth leh pahnihna Watford te hi tling chiang sa an ni.

Pathumna aṭanga parukna ten playoff hmangin hmunruak pakhat an inchuh ang. Play off-ah hian pathumna dinhmun hauhtu Norwich City leh parukna Ipswich Town an inkhel anga, a chak zawkin final-ah palina Middlesbrough leh pangana Brentford te chak zawk an hmachhawn dawn.