Serie A Italy-ah a tum li nan Juventus an champion

Juventus chuan a zawna a vawili na atan Inrinni zan khan Serie A champion nomawi an chawi leh ta. Juve hian Arturo Vidal-a goal khat tauh luh hmangin Sampdoria chu 1-0 in an hneh a ni. Tun hmain Serie A-ah a zawna vawili champion thei an la awm ngai lo.

Sampdoria nen an inkhelh hma hian Juve hian champion turin point khat chiah an mamawh tawh a, mahse an mamawh aia tam point thum an hlawhchhuak thei a ni.

Tun season chhungin Juventus hian Serie A-ah vawi thum chiah chak loh an neih bakah ṭum sarih chauh an khingpui te an inhnehtawkpui. Match 34 an khelh tawh aṭangin vawi 24 hnehna an chang thei. Massimiliano Allegri nau te hian goal 64 khung tawhin an lamah goal 19 chauh an la chhuah thung. Striker Carlos Tevez chuan goal khung hnem berin goal 20 a khung.

Juve champion na inkhelah hian season thara Champions League khelh beisei na chhete la nei ve Sampdoria hian point hmuh tumin nasa takin bei mah se Juve tlarhnung an sut hawn zawh loh bakah minute 32 na a Stephan Lichtsteiner cross ball vengtu nei lo Vidal-a tauh luh chu inkhel tawp thlengin an sut thei lo.

Mi pawimawh Allegri

Season ṭan dawn a sawiselna nasa tak kara an lak luh manager Massimiliano Allegri chu season a tawp meuh chuan ha hipin an fak leh si. Allegri hian Italy a team ṭha ber tur ni hiala an sawi chu season khat chhungin a din thei a ni.

Juve hian Antonio Conte thlak turin AC Milan manager hlui Allegri an lalut a, fans leh staff tam takin an duh lo hle. Mahse, Serie A match li khelh hmabak awm chungin a team te a champion pui theih bakah Champions League leh Italian Cup-ah champion an la in beisei ve ve bawk.

Kum 47 a upa Allegri chuan, "Season bul kan ṭan dawn khan mi tam takin ka lakah rinna an nghat ngam lo in min sawisel nasa tih ka hria. Mahse, ka buai phah lo tih lantir nan kei chuan result hmangin ka chhang let mai ṭhin. Champion kan nih theih nan hian mi pawimawh tak tak an tam, a bik takin ka player te thawh rah kan seng tlang mai a ni," tiin a sawi.

Juve goalkeeper Gianluigi Buffon chua, "July thla kha chuan tuna kan dinhmun tur hi kan ngaihtuah lawk pha lo mai pawh ni loin kan ring pha lo hle ang. Mahse tumruhna nena tihtakzeta kan beih chuan hlawhtlinna hi kan banphakah a awm a ni tih kan hmu chiang hlein ka hria. Kan manager leh ka team-mate te vang a ni e," a ti.