Leverkusen hmaah Bayern an tlawm

Inrinni zan Bundesliga inkhelah champion tawh Bayern Munich an inthlah dul a, khualmualah Bayer Leverkusen chu 0-2 in an hneh lo.

Bayern Munich-in Nilainiah Champions League semifinal first leg Camp Nou-ah Barcelona nen an khelh dawn avangin an players ṭha an chhawr meuh lo a, players zinga inhliam an ngah vang a ni pakhat bawk.

Bayern tan inhliam vanga thla kaw chhung zet a chawlh hnuin Javi Martinez hmuh tur a awm a, Claudio Pizarro, Mitchell Weiser leh Gianluca Gaudino te'n starting eleven an chan bakah Rico Strieder chuan a first team match hmasa ber a khel bawk.

Inkhel ṭan tir aṭangin Bayern an inthlahdah tih a lang a, an theihna zawng zawngin an khel chhuak lo. Second half-ah mual neitu Bayer Leverkusen lamin goal an thun ta nge nge a, Hakan Calhanoglu chuan free kick aṭangin minute 55 naah goal hmahruai a khung. Mario Gotze chuan minute 76 naah an si phurh sutna hun ṭha rawn nei mahse keeper Bernd leno chauh a hmachhawn hnuah goal a khung thei tlat lo. Bayern in an chance neih an chhawr ṭangkai loh an tuar a, minute 81 naah Julian Brandt chuan an goal hnihna rawn khung ve lehin an chakna a rawn nemnghet ta a ni.

Bayern tan Leverkusen laka an tlawmna hi tun season-a an vawi thum tlawmna chauh a ni.