La Liga Barca chak chiang; Real-in um ve zel
Luis Suarez-a'n Barcelona a zawm hnua a vawikhat nan Inrinni zan khan hat-trick a siam a, Barca chuan khualmualah Cordoba chu 8-0 in an sawp.
Lionel Messi chauh pawh buaipui tham a nih tawh laiin Suarez leh Neymar te nena an inkhawp hi Cordoba tan dan ngaihna a awm lo a ni ber. Barca tan Suarez-a'n goal thum a thun bakah Messi chuan tun seasona a goal 51 thun tlin nan goal hnih a khung bawk. Ivan Rakitic, Gerard Pique leh Neymar te chuan goal khat ṭheuh an khung bawk.
Argentina forward Messi hian season li chhung chu goal 50 ala thung tling ziah a, La Liga-ah Barcahmahruaipui mekin Real Madrid aiin point hnihin an sang mek a ni.
Barca manager Luis Enrique chuan, "Kan khel ṭha tak zet. Khatiang zat goal kha kan khung thei tih kan hriat avangin chumi tur chuan kan bei a, kan hlawhtling bawk a ni. Mahse, tunah hian champion thawkin kan la thaw mai tur a ni lo, match thum khelh hmabak kan la nei a,Real Madird hian point hnih chauhin min thlauh bawk avangin chetsual a thiang lo," tiin a ṭawng fimkhur hle.
Hat-trick 29 na
Real Madrid super star Cristiano Ronaldo chuan Sevilla lakah hat-trick siamin a team te a chak pui a, League hmahruaitu Barcelona an um ve zel.
Inrinni zana Ronaldo hat-trick hi Real a zawm hnua a har-trick vawi 29 na chiah a ni. Kum 1964 a Real legend Alfredo Di Stefano-a'n record a lo siam tawh hat-trick 28 chu a khum ta chiah a ni.
Ronaldo hian minute hnih chhungin goal hnih a khung hman a, inkhel ṭan aṭanga minute 36 leh 37-ah goal khungin a team te hma a hruai pui. Sevilla tan Carlos Bacca chuan chawlh lawk hma chiahin penalty
aṭangin an si phurh a sut ṭhen ve bawk. Second half minute 68-ah Ronaldo chuan a goal thumna a tauh lut leh a, minute 79 naah Vicente Iborra-a'n goal khat khung ve leh mah se inkhel tawp thlenga goal dang a luh belh tawh loh avangin Real hi 3-2 in an chak ta a ni.
Real Madrid manager Carlo Ancelotti chuan, "Kan chakna goal zat chu engpawh nise kan buai tur a ni lo. A pawimawh ber chu point thum hmuh a ni zawk. Game khat a goal riat thun ai chuan goal khat te te a game riat chak zawn a pawimawh zawk," tiin an elpui Barca a chhaih zauh.