Bangalore leh Hyderabad an chak
Inrinni tlai India Premier League -ah inkhel pahnih a awm a, inkhel hmasa zawkah Royal Challengers Bangalore in Kolkata Knight Riders wicket sarih a an hneh hnuin inkhel hnuhnung zawkah Sunrisers Hyderabad in Chennai Super Kings run 22 in an hneh bawk.
Ruah sur tihbuai inkhel
M.Chinnaswamy Stadium, Bengaluru-a inkhel ruah sur in a tihbuai vangin over khelh tur pangngai a ruahman zat over 20 khelh a ni lo a, over 10 thleng chauh khelh a ni.
Kolkata in over 10-ah run 111 an hlapchhuak a, mi pali chiah an hloh. Kolkata tan Andre Russell a che ṭha a, Jamaican batsman hian ball 17 lek a hmachhawnah run 45 a vawchhuak. Over 10 leka an run siam zat hia chhe hran lo.
Bangalore-in an target hi umin buaina an nei lo. Kum 23 leka upa Mandeep Singh-a'n ball 18 a hmachhawnah run 45 vawchhuakin a team a chakpui a ni. Bangalore hian over 9.4-ah run 115 vawchhuakin mi pathum chiah an hloh a, wicket sarih in chak zawkah an ṭang ta a ni.
Chennai ngam loh Sunrisers
Rajiv Gandhi International Stadium, Hyderabad-a inkhelah mual neitu team in an mikhual lakah ṭhat an chhuah duh lo a, Sunrisers Hyderabad-in Chennai Super Kings an lo barakhaih.
Hyderabad-in over 20-ah run 192 an vawchhuak a, mi pasarih an hloh. Hyderabad tan captain David Warner a hmuhnawm a, ball 28-ah run 61 vawchhuakin dinhmun duhawm takah a team a hlangkai.
Chennai-in theihtawp chhuah in an target hi um mah se, an ti hleithei lo. An batsman zinga run siam hnem ber Faf du Plessis chuan run 33 tlin hramin over 20-ah run 170 an vawchhuak a, mi paruk hlohin run 22-in chak lo zawkah an ṭan a ngai ta a ni.
Vawiin inkhel tur
Tlai dar 4:00-ah MA Chidambaram Stadium, Chennai-ah Chennai Super Kings leh Royal Challengers Bangalore an inkhel anga, Zan dar 8:00-ah Kolkata Knight Riders leh Sunrisers Hyderabad te Eden Gradebs Kolkata-ah an inkhel bawk ang.