MSL1 roreltu Khatla TBL

Samsung 3:16 Plan Solution Mizoram Super League Season 1 a ṭiak ta. Khatla TBL-in league stage-a ṭum hnih an hneh tawh Zarkawt BCA 67-61 a hnehin an champion.

Zirtawpni zanah Hawla Indoor Stadium-ah mipui an leng lo a, kal tlai tan hmun a awm lo - main gate kalh a ni.

Champion team Khatla TBL-in Rs 1,00,000 an dawng a, pahnihna Zarkawt BCA-in Rs 50,000 an dawng ve bawk. Khatla hian gate entry-a an pawisa hmuh Rs 36,000 aṭangin Rs 18,000 (50%) chu Zonet vehbur khawn 'Mizoram for Nepal' tan an hlan.

Final zana point 21 score-tu TBL coach/player H. Laldinsanga (Mapuia) chu Most Valuable Player-a thlan a ni a, palina Mission Veng Vikings captain Moses Zoremmawia chu Most Defensive Player a ni.

Team pahnih warm up aṭangin mipui thawm a ṭha a, inkhel pawh a tir aṭanga a tawp thlengin a nung tluan chhuak zak.

Khatla TBL bul ṭantu panga zingah Pratham Singh a tel lo; H. Laldinsanga, Vanlalnunsanga, Vanlalmuana, Nelson Lalrohlua leh R. Lalmalsawma te'n bul an ṭan. Zarkawt BCA tan Michael F. Lalawmpuia, Jackson Lalrintluanga, Albert Lalramchuana, David Lalruatfela leh Henry Lalramngaihawma te an lut ve bawk.

League stage-ah vawi khat chiah chak lo Khatla TBL-in inkhelh tir aṭanga tawp thlengin hma an hruai char char a, Zarkawt BCA-in hlat lai an nei meuh lo.

BCA tana che ṭha Jackson-a'n point 13 nei mah se freethrow a hlah nual a, a ṭhiante an danglam lo - vawi 26 freethrow-ah vawi 10 chiah an lut a, an hlah zat point 16 hi team pahnih point inthlauhna let hnih aiin a tam zawk.

BCA captain Dave a che thei lo a, khelhna hun a hmu tam tho chu team-in an tuar a, Zarkawt tan point 14 zet khungtu Henry a hmuhnawm a; veteran player Michael F-a leh Albert-te an khel chhe lo a, TBL um phakna hun ṭhaa Michael F-a hlah leh Albert-a ball hloh te chu MSL nomawi chawi loa an thlirna chhanah a ngaih theih.

TBL an chesual ṭha duh lo a, a hun taka time out an ko leh an time out-in awmzia a neih zui zelte chu coach Mapuia ṭhatna lantirtu a ni. Final-ah Nelson-a che ṭha a, Mapuia a hun takah a rah ṭhin.

BCA khung tur dan kawngah Mala a ṭangkai a, Vanlalmuana final boruak-ah a zam lo a, inkhel tir lama che ṭha Gospel Lalthawmmawia hun tawp lamah a par bawk. India player Pratham game pangngaiah langsar loh mah se freethrow vawi 14-ah vawi khat chiah a hlah a, BCA team pumpuiin an tluk lo. TBL leh BCA danglamna chu freethrow a ni.

Zarkawt BCA coach R. Liansangpuia chuan, "Freethrow kan lut thei lo lutuk kha kan chak lohna chhan chu a ni. Kan player-te an khel ṭha a, Khatla TBL te ka lawmpui," tiin a sawi.

Zarkawt BCA assistant coach Lal­ruatfela, "Final boruak sangah senior player-te chungah rinna kan nghat a, chak lo mah ila kan tihsualna ka hre lo. Player naupang zawk Zorina leh Remsanga te'n final-ah khelhna hun chang lo mah se anni hi season thara min champion pui thei tur an ni. Tun ṭumah chuan champion phu zawk an champion-ah ka ngai," tiin TBL an ṭhat zawk thu a sawi.

Khatla TBL manager Lalawmpuia Pachuau chuan, "MSL hian basketball-ah danglamna a thlen a, a buatsaihtu MBBA leh Zonet an fakawm. Champion hmasa ber kan nih avangin ka lawm takzet a, veng mipui leh veng pawn lama kan supporter ṭawiawmna hi rin phak bak a ni. Kan lawm takzet a ni," tiin a sawi.

Score Theite

Khatla TBL : Pratham Singh - 21 pts; Mapuia - 16 pts; Muana 14 pts; Nelson 10 pts; Gospel 4 pts.

Zarkawt BCA : Henry - 14 pts; Jackson 13 pts; Michael - 10 pts; Dennis 8 pts; Albert - 9 pts.