CT Group Cup YMA Football Vawiin aṭangin Round of 32

CT Group Cup CYMA Inter Branch Football Tournament 2015-ah champion lai Armed Vengin vawiin chawhma dar 11:00 hian 2012 Red Ribbon Football champion Chanmari an hmachhawn dawn. Hei hi Round of 32 ṭanna tur a ni.

Armed Veng hian Round of 32 thleng turin an match hmasa berah Phunchawng chu 11-0 in an sawp a, an game hnihnaah Farkawn chu 2-0 in an hneh bawk . Armed Veng khingpui tur Chanmari hian an match hmasa zawkah Dam Veng 3-0 in an hneh a, an match hnuhnungah Thuanpui chu 1-0 in an hneh bawk.

Inkhel hnuhnung zawkah Ramthar Veng leh Sihphir Venghlun te an inkhel thung ang. Round of 32 thleng turin Ramthar veng hian Thingsai leh Zanlawn chu 2-0 ve ve in an hneh. Sihphir Venghlun hian Round of 64 paltlang turin Edenthar chu goal awm lo an inhneh tawkpui hnuah penalty shootout-ah 4-1 in an hneh a, an match hnuhnung zawkah Kelsih chu 2-2 a an inhnehtawkpui hnuah penalty shootout hmang bawkin an chak.