Mayweather hneh thei an la awm lo

MGM Grand, Las Vegas-a mipui sing chuang pungkhawm te'n,"Manny,Manny" tiin Manny Pacquiao ṭanin an au rual a, mah se Filipino boxer hian amah ṭantute beiseina a ti hlawhtling zo lo.

Pathianni zinga inhnek ropuiah Floyd Mayweather junior leh Manny Pacquiao te an inhnek a, unanimous decision-in judge te'n Pacquiao hi chak lo zawkah an puang. Point an pek dan chu 116-112, 116-112, 118-110 a ni.

'Fight of the century' tia a hming lem an vuah inhnekah hian a dan pangngaiin Floyd Mayweather -a'n defensive game a khel a, Pacquiao-a'n attacking game hmuhnawm tak a lantir thung. First round ṭan tir lamah boxer pahnih hi fimkhur dun viau mah se round 2 aṭangin Pacquiao-a'n Mayweather a um ṭan a, a nawrtu zawkah a ṭang char char a; nimahsela Mayweather hi a inven thiam bakah a hnek lêt fuh theih em avangin American boxer hi chak zawkah a ṭang ta a ni.

Division pangaa champion thei Mayweather-a'n a record duhawm a chhawm nung zel a, match 48 chhung chu hneh loh a tawng ta lo. Rocky Marciano-a'n record a lo siam tawh vawi 49 inhnekah hneh loh tawng lo chu um pha turin vawi khat chiah chak a mamawh ta.

Mayweather hian inhnek zawhah boxing chawlhsan mai loa vawi khat tal inhnek leh a tum thu a sawi a, Mayweather hnek tur hian British boxer Amir Khan leh IBF welterweight champion Kell Brook-te chu hming langsar pawl an ni.

Mipui ṭan rawn, division paruka champion thei Pacquiao erawh a vawi ruk tlawmna a ni ta. Kum 36-a upa boxer hian vawi 57 hnehna chang tawhin vawi hnih a khingpuite a lo inhnehtawkpui tawh a ni.

Boxing chanchina sum tamna ber inhnekah hian boxer pahnih hi an hausa haw lawih a, sum lut zawng zawng dollar maktaduai 400 aṭanga hlawkna tlingkhawm dollar maktaduai 230 chu boxer pahnih hian an insem.

Eng nge an sawi?

Kum 38-a upa WBO, WBC leh WBA welterweight champion ni ta Mayweather chuan, "Hnehna ka chan avangin Pathian hnenah lawmthu ka sawi a, min

ṭan tura ka fan lo kal khawmte leh khawvel hmun hrang hrang a mite hnenah lawmthu ka sawi bawk. Pacman hi fighter ropui leh ṭha tak a ni a, tunah chuan boxing-a mi hlawhtling leh ropui zinga a tel chhan hi ka hre ta. Nasa takin min rawn bei dawn tih ka hre lawk a, ṭha takin rawn hnekchhuak ṭhin mah se ka lo inveng thei zel a ni. Zaninah hian ka tih tur tak ka ti thei a, ka lawm hle," tiin hnehna a chan avanga a lawm thu a sawi.

Mayweather chuan, "Mi tam takin inhnek hlau angin min sawi a, mah se vawiinah hian ka hlauh loh zia chu chiang takin ka hmuh tir a ni," a ti bawk.

Chak lo zawka ṭang Manny Pacquiao chuan, "Ṭha takin ka inhnek a, ka chak zawkah kei chuan ka ngai. Mayweather khan ring chhungah engmah a ti lo a, a tlan kual ringawt a ni. Vawi tam tak ka hnek fuh a, a tlan kual reng avangin ka duh angin ka hnek hnem thei lo zawk a ni. A tharum chak leh pumraw lenna kha ka tan buaina a tling lo, ani aia palian leh chak zawk vawi tam tak buai loin ka lo hnek tawh ṭhin," a ti.

Pacman chuan a dar hliam vanga a khelh ṭhat theih loh thu sawiin, "Kan inhnek hma kar thumah khan ka darah hian hliam ka tuar a, inhnek hmaa injection ka dilna chu Nevada Athletic Commission-in min hnar sak mah se inhnek ngei ka duh si a ni," a ti. Pacman chuan a hliam vangin ṭum danga a inkhelh angin duh anga a hnek chhuah theih loh thu a sawi bawk.