Real Madrid nge nge kan ti leh ṭhin!

Borussia Dortmund lakah 2-0 ngawtin hnufual hman mah se, 'Real Madrid nge nge' tih a ngai leh ṭhin - Champions League ngam em em mai club hian goal nga an khung leh a, Dortmund lakah 5-2 in an chak daih!

Dortmund tan Donyell Malen leh Jamie Gittens ten first half minute 34 chhungin goal hnih an khung a, Santiago Bernabeu-ah 2-0 in hma an hruai. Mahse, German club hian European champion hi an chhaih kawlh mai a lo ni.

Real tan Vinicius Junior chuan hattrick siamin a chhanglet a, Antonio Rudiger leh Lucas Vazquez ten goal khat ve ve an khung bawk a, Dortmund lakah Real an chak chiang hle - Carlo Ancelotti naute hi tun season Champions League match thum an khelha an vawi hnih chakna a ni nghal.

An talbuai

Santiago Bernabeu-a inkhel ṭantir lamah Real an talbuai a, an tlawm leh mai dawn niin a lang - Dortmund an hmachhawn hma hian Lille chu 1-0 in an lo ngam lo tawh a, German club lakah hian tlawm leh ngat se Real hian AC Milan leh Liverpool an la hmachhawn dawn bawk si avangin an dinhmun a chhe dawn hle.

Real fan-te hlauhthawnna chu minute 30-na lekah Donyell Malen chuan goal hmangin a belhchhah a, Real fans an reh - minute li a liam awrh a, Dortmund bawkin an khung chhunzawm. Goal khungtu Malen siamsak chu Gittens chuan an goal hnihna ni turin a khung a, 2-0 a ni der!

Mahni muala match 14 zet Champions League-a tlawm tawh lo Real an hawihai a, rin hlawh lo zawk Dortmund an hlim. Goal dang lut loin chawlhlawk hman a ni a, fans ṭhenkhat chuan Real in mutsan hman hial kha...

Mahse maw

Real-in chawlhlawkah eng thu nge an ngaihthlak hriat a ni lo a, Carlo Ancelotti-a'n a naute a fuih phur tih erawh a chiang - second half-ah goal ngain Dortmund an chhanglet a, an chak chiang hle!

Minute 60-naah Rudiger chuan si phurh sut ṭhenna a tauh lut a, minute hnih hnu lawkah Vinicius-a'n khung ve lehin, si phurh a sut zo zui. Dortmund tan captain Julian Brandt-a'n chance a nei ve leh a, mahse, Real keeper Thibaut Courtois chuan keeper class sang a nihna pholangin a dang.

2-2 a nih hnuah Real tan Vazquez chuan goal khat khung ve lehin, Vinicius-a'n hemi hnu hian goal hnih khungin hattrick a siam zui - goal hnih hi player thiam bik ke aṭanga chhuak a ni.

Vinicius Ballon D'or

October 28, Thawhṭanniah Ballon D'or sem a ni dawn a, Vinicius-a'n hattrick hmangin football khawvela mimal chawimawina hlu ber dawn phu a nihzia a pholang - hattrick a siam hian fan-te chu "Ballon D’or - Vinicius Ballon D'or" tiin an lo au rual!

Kum 24 mi forward hian a goal hmasa ber hi hnai set sawtah a khung a, a goal hnihna erawh a 'cial hle - mual chanve vel aṭanga ball tlan puiin, Emre Can a tlan pelh hnuah box pawn aṭangin mawi zetin goal-ah a chantir.

Hei hi a tawpna a la ni lo. Yard 40 vela hla aṭanga ball tlanpuiin, defender pathum a bum hnuah goal-ah a chantir. Vinicius chuan, "Kum 24 mi chauh ka la ni a, Madrid tana kumkhuaa khelh mai ka duh - thil tam tak min tihsaktu club hi ka theihna zawng zawng hlan let ve ka duh a ni," tiin a sawi.