PSG an chak zo lo

Vawi khat tal Champions League nomawi chawi duha sum tam tak sengtu Paris St-Germain an che fuh hleithei lo - an mikhual PSV Eindhoven nen 1-1 in an inhnehtawk a, tun season UCL match thum an khelh aṭangin point li chiah an la hmu!

PSV hian minute 34-naah Noa Lang hmangin goal hmahruai an khung a, midfielder Joao Neves tihsual zar an zo - PSG tan Achraf Hakimi chuan minute 55-naah si phurh hi a sut a, goal dang lut tawh loin, 1-1 in an ṭin.

Paris khawpuia inkhelah mualneitu team an talbuai a, goal khung an harsat tlat. French club tan Ousmane Dembele ke hmui loh zan a ni a, chance ṭha vawi tam a hlah. Goal khungtu Hakimi pawhin chance dang a neih a hlah zui a, a uiawm ṭhin hle.

PSG hi penalty an hlawh chhuak nia an inngaih chu sutsak an ni bawk. Olivier Boscagli-a'n Marco Asensio laka a foul nia a lan avangin referee Glenn Nyberg chuan penalty spot a kawk a, mahse, video assistant referee (VAR) hmanga a ennawn hnuah a thutlukna hi a sut a ni.

Tun season-a PSG tana goal sarih khung tawh Bradley Barcola pawhin uiawm takin a chance neih a chhawr lo a, PSG hian CL match thum an khelhah goal hnih chiah an la khung! PSV lakah pawh vawi 26 ngawt shot an nei a, mahse, goal ber an khung hleithei tlat lo.

Dutch club PSV hi rin loh deuhin an chak zawk ṭep hial a, mahse, Mauro Junior chuan hun tawp lama a hun ṭha neih goal-ah a chantir thei lo.