Champions League ngamtu Aston Villa

Aston Villa-in an season duhawm hman an chhunzawm zel a, Champions League match thum an khelhah an la chak vek - an mikhual Bologna chu 2-0 in an hneh a, captain John McGinn leh Jhon Duran ten goal khat ve ve an khung.

Villa hian minute 55-naah an goal hmasa zawk an khung a, McGinn-a ke aṭanga chhuak a ni. Scottish midfielder hian hlauhawm pawh ni loa ngaih aṭangin free kick a pet a, Bologna goalkeeper Lukasz Skorupski chu sawt khumin, goal-ah a lut daih!

Italian club an tho tawh lo. Thla 11 hnua Villa Park-a a vawi khat nana bul ṭan Jhon Duran chuan an goal hnihna a khung a, kum 20 mi forward tan tun season-a match 12 a khelh aṭanga goal sarih a khungna chiah a ni.

Emery-a 'magic'

October 2022 khan Villa hian coach atan Unai Emery an la lut chauh a, hetihlai hian Premier League table mawng lamah an talbuai hle. Mahse, kum 2024 a her chhuah meuh chuan Champions League an khel a, match thumah an la chak vek!

Kum 26 hnua Premier League-a bul an ṭan ṭhat ber season hmang mektu Villa hian Club Brugge (khualmual), Juventus (mualneitu), RB Leipzig (khualmual), Monaco (khualmual) leh Celtic (mualneitu) te chu Champions League-a an la hmachhawn tur an ni a, an fixture enin knockout round luh chance a sang ta hle.

Tun season-ah Champions League kalphung thlak a ni a, group khatah an vaia awmin, a sang pariatte chu last 16 an lut nghal dawn - team dang 16 (9-24) ten playoff hmangin hmun ruak dang pariat chu playoff hmangin an inchuh leh ang.

Tichuan...

Villa-in match thumah hnehna an chang ta a, Opta-in a chhut dan chuan last 16 lut turin point 15 hmuh a tawk - Villa hian match thum aṭanga point kua hmu tawhin, match nga khelh tur an la neihah vawi hnih an chak leh chuan last 16 luh nan a tawk dawn tihna a ni.

Premier League club vantlang ni ṭhin Villa hian tun dinhmunah Champions League table chung ber an luah mek a, he thu buatsaih a nih lai hian match thum khelh tawha chak vek awmchhun an la ni mek - match hniha vawi hnih chak Brest, Benfica, Bayer Leverkusen leh Liverpool te nizanah an inlan tih erawh hria ila.

Hetihlai hian Villa coach Emery-a'n tih tur erawh a nei. Goal a khung zawh hnu lawka lakchhuah Duran a lungawi lo a, khelmual pawnah thinrim takin a che. Mahse, Colombian forward-in goal a khung hma hian Emery chuan amah thlak tur hian Ollie Watkins a lo tifel hman tawh a ni.