Inter Village Futsal-ah a thiam pariat a hriat ta

BR Studio MFA Inter Village Futsal Tournament 2024 quarterfinal khel tur a chiang tawh. Ainawn Veng LC, Dawrpui LC, Aizawl Venglai LC, Zonuam LC, Sihphir VC, Chanmari LC, Durtlang LC leh Tlangnuam LC ten October 26, Inrinni hian R. Dengṭhuama Hall-ah quarterfinal an khel ang.

Last 16 hi October 22, Thawhlehni khan khelh a ni a, inkhel a nung hlawm hle. Match riatah penalty shootout vawi li a awm a, hun tawp lama result inthlak danglam thlengin a awm. Chung zinga langsar chu Dawrpui 'comeback' a ni a, Hmunṭha tan Lalhmingmuanpuia'n minute 40-naah hattrick siamna goal a khung.

Futsal hi minute 40 khelh a ni a, Hmunṭha hi chak mai tura ngaih ni mah se hun pek belh minute hnihnaah Hmunṭha player Hmingmawia'n an lamah a tauh lut. Penalty shootout hmangin chak zawk zawn zui a ni a, Dawrpui 5-3 in an vannei ta zawk.

Dawrpui ang thoin Aizawl Venglai, Zonuam leh Sihphir te penalty shootout hmangin an chak. Last 16-a chak chiang ber Ainawn chakna zat pawh 2-0 chauh a ni a, Chanmari West LC an hneh.

Futsal thiam veng Chanmari LC-in team ṭha Ramhlun Vengthar hnehtu Rangvamual LC chu 1-0 in an hneh a, Durtlang LC-in futsal khel thiam khua Muthi VC chu 3-2 in an hneh. Inkhel hnuhnung berah goal kua ngawt a lut a, Tlangnuam LC-in Laipuitlang LC chu 5-4 in an hneh hram.