Ozil-a hma hun tur a chiang lo

Mesut Ozil chuan Arsenal tana a contract a hman zawh hunah a pawtsei dawn nge hmun dangah a chhuak dawn tih a la sawi thei lo a, sum tamna lam pan tur anga sawina erawh a pha thung.

Unai Emery kaihhruaina hnuaiah Ozil hian en kan a hlawh a, nikum December thla aṭanga manager thar Mikel Arteta a rawn lan chinah erawh Premier League match an khelh tawh hoah chuan bul a la ṭan vek.

Germany international hlui hian Emirates Stadium-ah season thar lo awm leh tur daih chiah contract a nei tawh, tunah hian Major League Soccer club DC United bakah a chawr chhuahna Turkey club Fenerbahce nen sawizawm mek a ni.

Kum 31 mi Ozil chuan, “Season hman lai a zawh hunah chuan kum khat daih chauh contract ka nei tawh dawn, chumi hnuah chuan eng nge lo thleng dawn ka hre lo, thil lo awm tur hre lawk thei ka ni bik tlat lo. Tuna ka tih theih chu team tan a ṭha thei ang bera khelh a ni mai,” tiin a sawi.

Manager thar Arteta kaih-hruaina hnuaiah hmasawnna an neih thu sawi zuiin Ozil chuan, “Hun harsa kan hmang mek, thla hnih chhung lekin Mikel hian thil hrang hrang a siamṭha hman, tuna kan tum chu Champions League khelh phak a ni,” a ti.

Arsenal hi thlasik chawlh hmangin Dubai-ah an awm mek, an league match khelh leh hmasa atan chuan February 16, Pathianni hian Emirates Stadium-ah Newcastle United an hmachhawn ang.