Arsenal lawm a kim lo
Champions League an khel a, an mikhual Shakhtar Donetsk 1-0 in an hneh - an chak avangin Arsenal lawm viau mah se an lawm erawh a kim lo, an defender pawimawh Riccardo Calafiori chuan hliam a tuar.
Thawhlehni zan khan Emirates Stadium-ah Mikal Arteta naute hian Shakhtar an hmachhawn a, goal awmchhun hi mikhual goalkeeper Dmytro Riznyk-a'n anmahni lama a tih luh niin, goal luh theih nan Gabriel Martinelli a thawh hlawk hle.
Gunners hian a tir lamah goal an nawr na viau a, striker Gabriel Jesus leh Calafiori ten hun remchang pawh an nei, mahse keeper Riznyk an paltang thei lo a, an mamawh tawk goal erawh a hnuah an sual chhuak thung.
Secnd half-ah defender Calafiori hi a hliam a, thlak a ngai hial. Goal hnihna khung theihna remchang ṭha bik pawh an hmu, mahse an penalty hmuh chu Leandro Trossard chuan a hlah, goal khatah an lungawi a ngai ta a ni.
Shakhtar Donetsk lakah hian hliam vangin captain Martin Odegaard leh Bukayo Saka te an chhawr thei lo a, defender Jurrien Timber pawh a chawl mek, tunah Calafiori a hliam belh leh ta chiah.
Gunners manager Arteta chuan, "Hliam a neih avangin a inkhel chhunzawm thei lo, a nihna takah chuan rilru a luah hneh hle," tiin a sawi a, tun kar tawpa Premier League hmahruaitu Liverpool an hmachhawn tur a ngaihtuah tel ngei ang.
North London club hian tun hnai ni 21 chhungin match pasarih ngawt an khelh a ngai dawn, player hliam an neih bakah William Saliba chu hram a ni - Reds a hmachhawn thei dawn lo, an tan fiahna hautak a ni chho mek.
Arteta chuan, "Ram hla tak takah kan naute an zin chhuak a, ṭhenkhat chu Brazil-ah te an kal. An lo kir aṭanga rei lo teah kan inkhelh nghal a ngai, ni hnih leh a chanve liam ta mai pawh khan match kan khel.
"Pathianni zanah match hautak kan khel leh nghal dawn, inbuatsaih nan ni li chhung hun kan nei dawn. Mi tam tak chuan buai turah min ngai mai thei, amaherawhchu ṭha takin kan rawn khel ang tih ka sawi duh a ni," a ti.
Arsenal hian EPL hmahruaitu Liverpool hi point liin an phak lo mek. Emirates Stadium-ah an mikhual an hneh a nih chuan an inkar sawrzim theihna remchang ṭha bik a ni ang.