Dinsanga hmaah Tanzania Boxer

Mizo professional boxer ṭha Laldinsanga tan Asia title fight hmain fiahna paltlang hmasak phawt a ngai. Mizo tlangval hian November 9, Inrinni hian Tanzania boxer Juma Nassoro a hmachhawn ang. Lunglei Ramthar boxer Dinsanga hian hnehna a chang a nih chuan November 30, Inrinni hian Asisa title a fight thei ang.

Tanzania boxer Juma hian professional fight vawi 14 a hmachhawn tawh a, vawi kua hnehna changin vawi li a chak lo a, ṭum khat dangah chak zawk an awm lo. Juma hian vawi riat ngawt a khingpui a knockout tawh a, chutihrualin fight hnuhnung pahnihah a khingpui Bruno Tarimo leh Joshua Tusingwire te a hneh lo.

Mizo tlangvgal Dinsanga erawh vawi riat fight a hmachhawn tawhah a la chak vek a, khingpui knockout hi vawi nga a nei tawh. Kumin September 21, Inrinni kha a inhnek hnuhnung ber a ni a, Grassroot Boxing Academy, Bangalore-ah Mohd Junaid chu round khatnaah a knockout.

Dinsanga hi Sete Boxing Academy-ah ngawr takin inbuatsaih a nei mek a, Strength and Conditioning coach atan Lalbiakzuala Khenglawt (Project Fitness) a hmang. Mizo tlangval hi LPS Profight-ah kum 2022 khan light fly-ah a champion a, nikum khan bantam weight-ah a champion leh bawk.