A chung berah Kanan

Aizawl DFA buatsaih Yamaha First Division phase II-ah Kanan FC an che ṭha a, Chawngthansanga hote hian nimin khan an veng ṭhenawm Dinthar FC chu 3-0 a sawpin a chung berah an awm. Inkhel hnuhnung zawkah Ramhlun North-in College Veng 4-0 in an hneh a, Laldampuia hoten point thum an rawn hmu ve bawk.

Chawnga hoten phase 1 match hnuhnung berah Dinthar FC hneh lo mah se inkhel pawimawh zawkah an chesual nawn lo. Nimin inkhel Kanan tan Seling tlangval tlan chak Nicholas Vanlalhmangaiha'n minute 40-naah goal hmahruai a khung a, second half-ah Lalthuthlunga leh Daniel Lalṭanpuia ten an khung belh. Kolasib tlangval Daniel-a freekick a mawi takzet.

B. Zoramthara kaihhruai College Vengin Dinthar hnehin bul ṭan mah se Ramhlun North lakah 1-4 in an chak lo a, champion kalkawng a harsat phah ang. Point thum hlawh chhuaktu Ramhlun North-in champion beiseina tlem nei mah se Kanan chunga a awm a harsa tawh dawn.

Phase II-ah hian team palite hi vawi khat ṭheuh an inkhel chhuak ang a, point hmu sang ber an champion dawn. Kanan FC-in Ramhlun North leh Dinthar te 3-0 a an hneh ve ve avangin champion turin an dinhmun a ṭha hle.

Chutihrualin head to head en a nih avangin Kanan an la champion chiang bik lo. Match tawp bera College Vengin Kanan an hneh a, Dintharin Ramhlun North laka point an hmuh bawk chuan B. Zoramthara kaihhruai College Veng an champion thei dawn. Chawnga kaihhruai Kanan tan champion saa indah la rem lo.