Silly Point: 2024-25 Season Chibai

Fur ruahtui tla a hul ṭan a, India ram leh International cricket calendar pawh kumdang ang bawkin a khat chho leh ta hle. Zofaten mellung thar kan kai zel a, India cricket erawh hma a sawn chiah em? tih hi zawhna lian tak a ni.

Hmeichhe T20 World Cup

Hmeichhe T20 World Cup-ah Australia vawk lal lena chu tihtawpin a awm ta a, semifinal-ah South Africa an hneh lo. Aussies ṭhenawm New Zealand lanu rualte chuan Australia phuba lak sakin final-ah South Africa chu 32 runs-in an hneh. New Zealand hi World Cup-a an vawi khat champion-na a ni.

India hmeichhia te erawh ICC Trophy nen hian an inhal emaw tih mai turin, knockout round pawh paltlang zo loin an mualpho thung. India team-te hi UAE-a khelh World Cup atan an inpuahchahna a bei tham deuh emawni chu aw tih tur a ni a, tin an fielding chhe em em mai khan champion an phu lo kan ti thei ang.

Hmeichhe cricket standard kan hmuh aṭang hian, kan Mizo hmeichhia te hian mipa te aiin IPL (WPL) leh India team a luhna kawng an nei zau zawk tih a chiang reng mai.

Kiwis Hapta

Kiwis nula hoten World Cup nomawi an chawi lai mekin, an mipa team-te pawh kum 36 hnuah India leilungah Test match an chak leh hmasak ber ṭum chu Bangalore lamah tun ni thum liam ta khan a thleng a nih kha.

Tun hma aṭanga an lo sawi ṭhin, "Indian batsman ṭha te chhaih buai dan awlsam ber chu ball vawm swing thei leh swing theihna pitch a khelh hi a ni," an lo tih ṭhin chu, a lo la dik reng ni berin a lang.

Pune lamah vawiin hian Test ṭum hnihna khel ṭan leh tur a ni a. KL Rahul leh Md Siraj a te an chawlhtir a nih pawn thil mak a ni lem lo ang.

Ranji Trophy

Plate group lama team paruk inelna lamah Mizoram team-te pawhin an season 6-na hmel a lo hmu ve ta a. (Covid-19 vangin 2020-21 Ranji Trophy a awm lo). Kumhlui lamah pathumna a awm thei Bobby Zothansanga kaihruaina hnuaia khel Team Mizoram te hi kumin hian table-a pahnihna em hi chu ka la beisei lo.

Amaherawhchu pathumna bawka season hi an khar theih chuan hmasawn zawnga kal zelah ka inngai ang. Ram leilung fate zinga century siam thei pathumna ni turin Ramhlun Venglai tlangval Joseph Lalthankhuma chuan Arunachal Pradesh lakah century a siam a ropui hle.

1st innings-ah Mizoram hi che chhe zawk ni mah se Joseph-a century vangin inkhel kalhmang a danglam a, hetiang inkhel boruak sanga century a siam thei hian a theihna sanzia a pholang.

Mizo batsman-te hian kan Arunachali unau te hi kan ngam ve deuh hrim hrim a nih hmel bawk. 2019-20 season-ah Durtlang tlangval Lalhruaizela'n Mizo zinga Ranji Trophy century hmasa ber chu Pondicherry khelmualah, Arunachal lakah tho hian a lo siam tawh a, 2022-23 Season khan Dawrpui Vengthar tlangval Jehu Anderson-a'n, Nadiad khelmualah Bihar lakah a lo siam tawh bawk.

Tuna hming kan thailan tak pathum te khi cricket bul an pen tan tirh aṭanga ka hriatchian tawh te leh min rawn nek chhuak a, ka bat min dah ṭhattir tute an ni nghe nghe. Century tam tak Mizoram tan an la siam dawn chauhin a lang.

Fakselna

Sikkim laka round hmasa bera dawl zawra an zawr erawh Mizoram team tan a pawi thui thei a. Tunah hian Elite group aṭanga rawn tla thla hlim, kan la hneh hleihtheih loh, Professional players hmang miah lo a, an ram leilung fa meitei hlanga inkhel ngam Manipur nen an inkhuainuai leh ang.

Chumi zawhah chuan keini aia chungnung zawka ngaih deuh Nagaland leh Goa nen Ranji Trophy season hi khar tur a ni. Manipur hi hneh mai ni lo a, a sawp a, an sawp ngei a ngai ang.. A chhe bera pathumna tala season hi khar turin Team Mizoram te duhsakna sang ber ka hlan nghal e.

I lo thlir zel ang.