Mourinho-a'n Man United mikhual dawn

Manchester United chuan zanin dar 12:30 hian Europa League khel turin Fenerbahce an lenchilh dawn - Turkish club hi Jose Mourinho enkawl lai an ni a, team pahnih inkhel tur hian ngaihven a hlawh zual phah ang.

Portuguese manager Mourinho hi Man United ban hnu a ni a, tunah chuan amah bantu lakah phuba lak theihna remchang a nei dawn - Premier League club hi a lo hneh a nih ngat chuan, tuna an manager Erik ten Hag dinhmun a ti derthawng zual ngeiin a rinawm.

Fred leh Mourinho

Jose Mourinho chauh a ni lo, midfielder Fred pawhin a club hlui Man United a hmachhawn dawn. Brazil international Fred leh Mourinho te hi tun hmain EPL club tan hian an lo thawkdun tawh, tun hnaiah an inzui leh ta chat mai a ni.

Fred chuan, "Man United-ah khan kum nga chhung hun nuam tak ka hmang a, ka fa hmasa ber pianna hmun a ni bawk. Hmelhriat leh ṭhian tam tak ka nei a, inkhelh bakah nunphungah pawh nasa taka hma ka sawnna hmun a ni bawk.

"Tun ṭuma kan hmachhawn tur zingah hian ka ṭhiante pawh an la awm a, inkhel hautak tak a ni ngei dawn tih ka chiang. Keimahni khelmual a ni dawn a, khelmual sir aṭanga min puitute zarah Fenerbahce kan chak ngei pawh ka ring," tiin a sawi.

Brazilian midfielder hian 2023 August khan Man United a chhuahsan a, amah enkawl tawhtu Mourinho nen bawk an thawkdun. Fred chuan, "Phone hmangin min rawn bia a, a kianga inkhel turin ka inngaihtuah buai lo, ka rilru a hming nghal vek.

"Shakhtar Donetsk tana ka khelh lai khan Man United zawm turin min bia a, tah pawh chuan ka rilru ka siam fel nghal. Coach ṭha leh theihna nei sang a ni a, tun ṭumah pawh hian tum leh hmathlir fel tak a neih avangin ka zui a ni," a ti.

Turkish Super Lig lamah Fenerbahce hian match nga aṭangin point 17 an hmu a, palina dinhmun an luah mek - League champion nih chu a awlsam dawn lo. Nomawi chawi thiam manager an neih avangin Europa League hi chu an beisei ngam ang.

Ten Hag dinhmun

Ban mai tur anga thawm a rin lai takin Erk ten Hag-a'n result ṭha a nei leh hlauh a, kar tawp Premier League inkhelah Brentford an hneh. Dutch manager hi dinhmun nghet tak erawh a la ni chuang lo, zanin result hi a la pawimawh thei viau tura ngaih a ni.

Manchester United hian an captain Bruno Fernandes chu hrem vangin an chhawr thei dawn lo, an match hmasa zawka FC Porto an hmachhawn ṭumin hnawhchhuah a ni a, a aiawh tur thlan fel chu Ten Hag mawhphurhna a ni ang.

Porguguese midfielder Fernandes a awm loh chuan, tunin nge number 10 dinhmun luah ta ang tih chu ngaituah tham a ni. Mainoo, Mason Mount, Toby Collyer leh Dan Gore te chu Brentford lakah khan an la inlan thei lo a, zaninah 100% an ni hman in a rinawm loh.

Tawnhriat ngah Casemiro leh Manuel Ugarte te erawh an inlan thei dawn a, tlarhnung lamah Harry Maguire, Luke Shaw, Tyrell Malacia leh Leny Yoro te an la inkhel thei dawn lo, goal venhim lam hi a harsa lai tur chu a ni mai thei.

Ten Hag chuan, "Keimahni chauh kan ni lo, kan khingpui tur team tan pawh inkhel pawimawh a ni dawn a, chak ngei ngei duh pahnih kan intawng dawn a ni," tiin a sawi a, ban mai theih dinhmun a ding tih a hria a, an khingpui tur Mourinho pawh a dinhmun a ṭha bik lo niah a ngai.

Season chanve pawh la hmang tling lo mah se, tuna a lan dan chuan Man United tan Premier League nomawi beisei chi a ni lo. A sang zual pali zinga tel phak ringawt pawh a harsa dawn, chuvangin Europa League hi an ngaih pawimawh a ngai ang.