La Liga-in Miami-a inkhel turin Barca an duh!

Spanish football-a inelna sang ber La Liga chuan December-a Barcelona leh Atletico Madrid inkhel tur chu Miami khawpuia nghah an duh a, La Liga thuneitute chuan an duhna hi FIFA chuan a pawmsak an beisei.

La Liga ruahman angin Barca vs Atletico hi Miami-a khelh a nih chuan USA-a La Liga match khelh hmasak ber a ni dawn a, FIFA-in a pawmsak a nih chuan December 22-ah Miami-ah Spanish club lian pahnih hi an intawng ang.

Barcelona leh Atletico hian January-a khelh tur, team pali inelna, Spanish Super Cup chu Saudi Arabia-ah an khel dawn bawk - FIFA hian ram danga ram khat league va khelh kual hi a rem ti lo tawh ṭhin a, mahse, hemi chungchanga match promoter lar Relevent Sport nena an inkhinaah April khan an lo inhnukdawk tawh.

Hemi hnu hian FIFA chuan ram danga league khelh chungchang zirchiang tur hi a lo din tawh bawk a, La Liga president Javier Tebas chuan ram danga Spanish top flight league match ṭhenkhat khelh chungchang hi a lo sawi tawh bawk.

Barcelona bik hian January 2019 daih tawh khan Girona nena an inkhel tur chu Miami-ah hian nghah an lo tum tawh a, mahse, Royal Spanish Football Federation leh Spanish Footballers' Association ten an do avangin an ṭhulh - tunah La Liga zawkin hma an la leh ta.

La Liga hruaitute chuan hmalakna tur tam tak a la awm thu sawiin, FIFA aṭanga phalna hi hmuh ngei an inbeisei - football khawvela thuneitu sang ber hian a phalsak chuan Lionel Messi-te khuaah La Liga an khel dawn tihna a ni.